Can Bank：國泰口裏說不
■國泰口裏雖說不會變廉航，卻提供著廉航嘅服務質素。 資料圖片
國泰（293）將在周三公佈中期業績，油價升返，唔使問都估到燃油對沖條數應該會輸少啲，再者上半年貨運表現理想，加上一場又一場嘅縮皮大龍鳳，今次國泰業績值得睇嚇，燃油對沖終於唔使落咁重藥。
不過，縮皮大計並非零成本，相信傳媒下一個重點就會放在國泰航班質素上。
本報率先報道咗，國泰旗下波音777，新3-4-3座位表安排之下所出現嘅問題，客多咗，變相唔夠空姐派餐，再到廁所使用人數增加，所帶來排隊人龍。
仲未計若清潔次數無增加，自然會衍生出衛生問題；手提行李位無增加，客戶排完廁所又要排隊拎行李落機嘅問題。空姐空少工作量增加不在話下，客人坐位空間減少，磨擦自然增加，可想而知，客機嘅怨氣自然增加，服務質素出現問題只係遲早嘅事。
雖說個別中東航空公司有政府資助，飛機新，坐位空間大，服務質素好，全商業營運航空公司跟住做好難顧及盤數，但國泰口裏雖說不會變廉航，卻提供著廉航嘅服務質素，客戶定位自然變得模糊，商務客不再光顧，廉航客又嫌貴，最後可能會連忠實擁躉都失望離去。
散子
http://fb.com/散子-257101397966975
散子
Can Bank - 散子 舊文
來源 source: http://hk.finance.appledaily.com