中環在線：保監局發函：唔好喺高鐵sell單
■高鐵就嚟通車，保監局提醒保險代理唔好喺高鐵
sell保險單，有機會違法。資料圖片
廣深港高鐵傳下月23號通車，成條鐵路嘅管轄權從此割咗畀內地，正所謂「割地兩檢」，保監局噚日特登發通函畀各大保險公司，提醒佢哋要同保險代理講，如果遲啲喺高鐵上面sell保險單，有機會違反當地法例。
代理北上sell單激嬲阿爺
份通函特別解釋到咩叫做「內地口岸區」，例如話呢個區域已經係屬於香港以外地方，所以應用嘅法律有分別，保險公司要特別提醒代理記得要遵守當地法例。而根據內地法例，無論你係香港定係內地保險代理，只要你喺大陸sell香港保單，就一定會違法。
保監局仲特登補充咗句，話呢份通函唔構成法律建議，如果你對於以上嘅事有疑問，最好就係徵詢專業人士意見喎。
其實近年好多內地人鍾意買香港保單（特別係美元單，可以順便走資唔要人幣啩），所以會特登過境嚟到香港購買，但有啲代理就好踩界，會直接去內地搵鄉親父老sell單，而呢件事曾經激嬲阿爺，唔少不法中介公司曾經被嚴厲打擊，加上早前銀聯卡截水喉事件後要買保單都唔容易，所以內地人家陣買有剛性需求嘅醫保、人壽單比較多啲。
華華心諗，如果香港保險代理陪客人返內地家鄉，唔小心喺途中sell嚇嘢，咁點計呢？
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.finance.appledaily.com