三隻老股創新高
2018年08月09日
港股上周跌足五日，本周彈番三日，動力來源係人仔稍為穩定，美國總統特朗普未有新動作，加上港股呢期公佈業績唔錯，於是由超賣帶動回升。
呢期港股升浪領風騷者，同外圍稍有不同，唔係由科技股推動，而係由傳統股份領軍，昨日中電(002) 、
恒生(011) 同太古(019) 齊齊創出一年新高。
世道唔好資金回流「大冧巴」
大市由高位回落差唔多5000點，三隻藍籌能夠創出一年新高，都可算係難得。呢三隻都係恒指成份股中的老成員，睇佢地代號全部都係「細冧巴」，可見佢地全部成名甚早。佢地同一特色就係業務穩定，可預測性高，喺跌市中成為買家入市吸納目標。佢地有運行，除左個別業務循環周期有利之外，都係反映世道唔好，大家覺得老牌子信得過嘅心態。
三隻老股中，近排表現最搶鏡嘅係恒生，佢亦係最老當益壯的公司，股價唔止創左一年新高，仲係歷年新高。恒生受資金追捧，有銀行界認為係天時地利，天時係美國準備加息，有利銀行拉闊息差，所以全球銀行股喺第二季表現好左，呢個趨勢喺預期九月美國可能加息下都應該維持到。地利係恒生業務簡單，主要集中喺香港，香港銀行業仍係全球最好做的地方，生意多競爭少。同美國相比，香港監管已經無咁辣，恒生香港業務比重仍是各行之冠，故此食到正。另一點係佢自有資金多，由於股東資金豐厚，大量無成本貸款放出去，會成為利息上升的得益者，呢個狀況喺息口由低位回升時尤其明顯。
恒生收報216元，再升1.9%。O依家股價最大阻力係來自佢市盈率同估值都幾貴，O依家股價受追捧，說明市場追求保證利潤而唔係冒險，所以市場風險胃納高低，對佢估值會有影響。
中電狀況同恒生有啲相似。雖然佢多年前開始投資海外，但最好搵都仲係香港。無論喺澳洲抑或印度，當地政府一發現電力公司賺得多，就會出招。香港政府係最守合約精神的地方，明明電力公司賺大錢，都會「樂觀其成」，尤其呢次利潤管制協議，主責官員似乎對電力監管唔多熟，搞完一輪後，新協議首年竟然已經有價加，如此條款仲「筍」過港鐵的可加可減機制，管理層亦明言將來大家唔使旨意有價減。當基金同市場發現左呢樣嘢，立即湧入去追貨，所以喺佢加價前後，醒目資金就已經郁手，中電創新高後收報91.8元，倒跌0.4%。
有中環茶友笑言，按揭證券公司搞年金，叫人畀一百萬佢，保證成世每月攞五千幾元，好多人話不如畀中電幫我賺錢，更加肯定成世食硬啦。中電同恒生一樣，O依家估值都唔低，唔知幾時會回頭，買佢要有揸長線心態。
太古同恒生、中電有啲唔同，佢雖然都有國泰航空(293) ，本來呢門生意有壟斷性，可惜喺天空變成全球一家下，國泰面對內地航空公司喺國際航班的激烈競爭，加埋俾香港航空打入本地市場，令佢變成轉身緩慢的恐龍，生存相當吃力，所以幾年前開始陸羽仁多番警告，呢隻股不宜沾手。由於國泰拖累，大大削弱太古盈利同估值，所以佢係三隻老股中資產有折讓的股份。
太古皇冠上的明珠，O依家係太古地產(1972) ，佢喺香港無論係寫字樓同商場，都受惠市道向好，盈利表現甚佳。近年太古喺中國發展商場，組合逐漸成型，由於管理水平不俗，能夠同地方政府及合夥人傾到理想條款。雖然內地商場唔易做，佢都仍然能夠賺錢。由於太地股價大幅領先，於是資金吸納太古，昨日升上88.5元新高後，平收86.8元。太古股價同恒生、中電唔同，與歷史高位仲有好遠距離。近期唔少大行推薦佢，都係買佢資產豐厚同埋預期管理層會多啲動作。
喺傳統股份支持下，恒指三連彈，收報28359點，升左110點；國企指數收報10901點，漲35點或0.32%，成交931億元。除咗本地藍籌，油價向好，中石油(857) 升逾3%，收報6.07元；中海油(883) 升1.6%，收報13.08元；中石化(375) 升0.8%，收報7.6元。接連爆出工程醜聞的港鐵(066) 高層人事變動，周三復牌後股價受壓，一度挫逾3%，低見41.45元，收跌2.57%，報41.7元。
買鐵塔要唔怕悶
由三大電訊公司合組的中國鐵塔(788) 新上市，在保薦人力挺下收報1.26元，無升跌。鐵塔公司由三大電訊商合組，主要從事基塔投資。由於電訊公司前景被視為缺乏刺激，鐵塔上市反應平平，招股結果香港公開發售部份超額認購0.36倍，未觸及回補機制；國際發售部份亦獲溫和超額認購，定價為招股價範圍下限，1手至10手中籤率100%，估計集資淨額534億元。鐵塔暗盤曾傳破底，呢間公司業績平穩但比較悶，如果想買都可以等等，睇佢有無機會插穿招股價。呢類股份唔係咁刺激，入貨要計足數，抱著買唔到就算的心態，少少水位都希望執埋。
陸羽仁
金融High Tea 舊文
來源 source: http://hdfin.stheadline.com