魚樂無窮 - 唐牛 2018年10月25日
魚樂無窮：博反彈交易實錄 - 唐牛
弱市博反彈，最緊要入場前有曬計數位，嚴守紀律。 資料圖片 適中字型 較大字型
上星期五早上，無心戀戰的我，由於工作關係，繼續上網搵新聞做功課，與平常日子不同，大陸網站不斷彈出內地官員唱好股市的消息，包括中證監主席劉士余、央行行長易綱等，完全掩蓋第三季GDP增長遜預期的壞消息，A股亦節節上升。
最終令我由心動變成行動，乃副總理劉鶴直指中國股市目前是最有投資價值的市場，眾所周知，劉鶴為習近平最重要的智囊，說話含金量極高，加上中港股市當時處於低位，有一定值博率，所以合埋眼便掃貨。弱市下未諗贏先諗輸，心中有數輸幾多要走人，好彩入場後持貨繼續升，即時決定揸貨過夜，博炒到港珠澳大橋開通為止。
星期一，股市依照劇本繼續上升，持貨已有一定利潤，但對習近平南巡利好股市信念太強，再加上一點點貪婪，結果有糊都冇食，繼續過夜。
星期二，開通儀式早上舉行咁耐，個市跌足咁耐，持貨由賺大錢變賺少少，繼而觸及止蝕位，唯有嚴守紀律清貨離場，但總算在當日高位計數，不算太傷。
由贏變輸，心裏當然不是味兒，但從不會後悔，因為入場有曬計數位，用手頭利潤博多一浸，也有倒輸的心理準備，天氣不似預期也冇計，最緊要知道自己賭緊乜，對嗎？
唐牛
http://fb.com/tongcow88
本欄逢周二、四刊出
魚樂無窮 - 唐牛 舊文
來源 source: http://hk.finance.appledaily.com