智取大市：美股調整的前兆 - 晉佳
如果歷史重覆，當美股調整完、息差由擴闊變返收窄，就係美股最後入市時機。資料圖片
聯儲局主席鮑威爾講到，由於美國經濟表現正面，未來加息或高過中性水平，目前距離中性尚遠。即係話，息仲有排加，會加多過預期。咁突然嘅講法下，10年期美債息升越3.2厘，港股
大跌500點都合理。
值得留意係，2年期同10年期美債息差由收窄變擴闊。2014年至今，長短期美債息差一路收窄，當加息將大過預期，息差重新擴闊好正常。不過對美股嚟講，短線絕非好消息，對上一次美債息差反彈，就係2月初由50點子升至70點子樓上，美股便出現大跌市。今次喺美股創新高之下，同樣有條件形成較大幅調整，道指千點計調整不難出現。
大調整卻有可能形成入市良機。美債息差目前略高於30點子，但歷史上有出現息差變負數、即孳息率曲線倒掛嘅情況。市場上有種講法話，倒掛反映看淡經濟前景要沽貨，事實上，對上兩次準備倒掛時，反而係美股最亢奮階段嘅開始，包括2000年初，同埋2006年初至2007年中期間，如果重覆過往趨勢，短線美股最後晚餐可能喺嚟緊調整後發生。
關鍵係，今次美債息差擴闊，會唔會一如2月初，彈幾日就再度收窄？甚至孳息率曲線倒掛？如果歷史重覆，當美股調整完、息差由擴闊變返收窄，就係美股最後入市時機。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.finance.appledaily.com