異動空間 - 魏力 2018年11月2日
異動空間：讓子彈再飛一會 - 魏力
恒指日線「島形底」乍現，過去兩日有撈貨的戰友，不妨讓子彈再飛一會兒。資料圖片 適中字型 較大字型
港股兩日彈近千點，恒指日線「島形底」乍現眼前，樂觀去睇，只要不回補周四的上升裂口，年結前反彈（year-end rally）將會持續，過去兩日有撈貨的戰友，不妨讓子彈再飛一會兒。
「今次會否又係伏嚟㗎？」執筆前魏力剛做完直播節目，見觀眾在fb上的留言，絕大部份對此浪十分有保留。無他，之前彈親都係三兩日貨仔，諗多兩諗，一追就中伏，輸part都輸到驚，加上10月再冧近3,000點，日日都萬聖節，心態上已去到「寧願唔賺，千祈唔好再輸」，但經驗所得，市場越絕望，反彈越急勁，不妨睇嚇今次準唔準。
「大陸經濟咁差，貿易戰沒完沒了，梗係未跌完啦！」魏力要強調，港股唔係見咗大底，但經歷咗9個月跌市，近幾日市場開始對壞消息無反應，例如周三美滙指數升穿97，中國PMI瀕臨收縮，但中港股以至整體新興市場，幾乎就是視而不見，特別係出名「跟跌唔跟升」的港股，居然由頭挾到尾，更是非比尋常！
舉多個例，周四中午公佈10月澳門賭收數據，博彩毛收入按年僅升2.6%，遠遜預期的5%，並創逾兩年最低增幅。面對咁差的數據，濠賭股午後竟然照樣抽升，可見淡友見大市勁挾，大多選擇平倉食糊，甚至反手買上。淡友暫時收手，是反彈浪能否持續的關鍵。
魏力
http://fb.com/2012jason
本欄逢周一、五刊出
異動空間 - 魏力 舊文
來源 source: http://hk.finance.appledaily.com