富智康大縮水的教訓
2018年11月15日
美國中期選舉過後，資產市場大執位。美股出現選後症候群，杜指隔晚再跌100點，但同油價單日急插7.8%相比，就真係小兒科，以呢個跌幅嚟講，真係可以一日就跌死人。油價急劇波動，顯示資產市場高度敏感，無論玩乜，一不留神就會損手爛腳。
油價大力下插，不但下墜力度
出人意表，同時市場亦有點掉轉來炒。油組日前先放出消息，話研究緊減產，市場以為至少會有短暫提振作用，點知就喺呢個時候，特朗普大力反對油組減產，淡友順勢踩多一腳。炒油如果唔炒孖展，等如行路上廣州，若然用槓桿投資，如此波幅好多人都一棍出局。
資產市場閃跌頻現
油鱷出手噬好友一啖，有點趁住美國中選後施襲的味道。美國總統特朗普喺選舉期間，高調表明想油價下跌，佢咁講唔止出口術，而是在制裁伊朗的措施上最後大打鬆章。係特朗普放水下，油價已經陰陰哋跌，跌兩跌市場信心轉弱，結果誘發雪崩式下跌。
油價跌幅好得人驚，大家要小心呢個未必係個別市場事件，因為杜指早兩日都試過單日大插600點，之前試過更大跌幅，其他美債、外匯都有可能出現呢個狀況。因為從大氣候講，美國結束量寬，跟住進入加息時期，呢個情況好似地下水流失，突然就會引發地陷，所以買入資產要小心，限住注碼高沽低揸，不要不斷加注，先係自保之道。
國際油價周二重挫逾7%，「三桶油」繼續受壓。中石油(857) 收跌3.57%，報5.67元；中石化(386) 收跌2.25%，報6.51元；中海油(883) 插4.66%，收報12.7元，為「三桶油」中表現最差。油價下跌利好航空股，國航(753) 收漲4.2%，報7.69元；南航(1055) 上揚4.42%，收報5.2元；東航(670) 收升1.84%，報4.97元。
港股連升兩日後高開低收，恒指高開81點，報25874點，午後沽壓轉強，尾市一度跌303點，見25489點，跌穿20天線(25543) 。其後跌幅收窄，恒指收報25654點，跌138點，成交金額約794億元。
喺咁唔穩定的市場情況下，有啲投資者仍然鍾意博反彈。有中環茶友講起手機設備股，佢話好似隻瑞聲科技，一年高位見過182元，日前低位跌到49元，夠膽去撈的話，O依家佢上番52元樓上，已經夠水位食胡。不過，呢類撈底動作成功機會細過一半，失手就可能被綁。有人以為佢跌到咁低，若然被綁最多咪死坐，皆因佢假假地都係恒指成份股，係藍籌股。
對於藍籌工業股係咪唔怕坐，我就舉左個例，就係同樣做代工生產的富智康(2038) 。呢間公司喺2005年以3.88元上市，之後因為業績靚仔，被當成增長股炒，喺短短年半間股價暴漲，2006年高位股價達27.7元，比招股價勁升6.13倍，總市值一度高達1880億元。
高增長工業股風險大
但到2007年，富智康業績表現未符預期，屋漏偏逢連夜雨，公司近500名富智康高層跳槽至比亞迪，將技術及大筆定單帶到比亞迪，全年獲利僅7.21億美元，較前一年度的7.18億美元，輕微增長0.5%。雖然公司仍有增長，但已被摘去高增長股的光環，之後一直無運行。
就算唔睇高峰期的股價，只係睇過去三年，富智康曾經炒過一輪反彈，股價彈上3.5元，但跟住反覆回落，昨日收報0.77元，股價又蒸發咗接近八成。富智康的經歷，係咪會喺瑞聲身上再度出現，無人有水晶球可以批死，因為做廠間間都有啲竅妙唔同，只不過從富智康小股東的經歷，可見炒高增長工業股的風險，實際上比想博反彈的小股民預期大。喺市場驚濤駭浪中想執平貨，就要先計值博率，唔係話見佢跌得多，就一定等同扺買嘅。
陸羽仁
金融High Tea 舊文
來源 source: http://hdfin.stheadline.com