港息唔加 地產股小彈
2018年12月13日
華為公主孟晚舟事件有點好轉，加拿大法院批准孟晚舟保釋外出，美國總統特朗普表明隨時介入，事件氣氛稍為和緩，加上傳出內地準備好削減汽車關稅，港股先於外圍反彈，恒指升逾400點收市。
雖然中美貿易有可能柳暗花明，來年經濟始終有不明朗因素，樓市因此唔再係一片
唱好之聲。呢期又傳出新的《財政預算案》有可能出招，限制持有多過一個物業的業主享受差餉減免，若然方案落實，對於有樓未賣嘅業主，多少有啲加徵空置稅嘅味道。
《預算案》唔益發展商
近年庫房爆滿，經常會調減差餉，有時連地租都會減，發展商持有嘅單位入伙後，都會納入收差餉範圍，所以有議員批評減免措施令大財團成為得益最多者，當局研究後決定限制有多過一個物業嘅業主，只能申報一個單位減免。雖然此舉無法阻止用公司名登記嘅業主，但對於有樓未賣嘅的發展商，就變成緊㧜咒，未賣單位好難透過成立公司去取得減免。發展商一向多橋，經常鑽到法例漏洞，但呢次政府出招似乎唔易拆，對於手頭未賣單位多嘅發展商，可能又會唔見一筆。
早前政府提出收一手盤空置稅，希望令發展商加快賣樓，但建議並非先實行後立法，所以到現時等立法，都未真正推行，若然《預算案》有差餉減，同時又推行限量，咁樣仲快生效過空置率。當然，空置稅係按差餉標準收取，金額大好多，殺傷力相應增加。差餉寬免通常有上限，豪宅基本上不會全面豁免，新措施會令發展商少了着數，影響卻未至太大，但咁做至少令買唔到樓的市民會順氣啲。
雖然《預算案》會出招，但力度未算太辣，加上本地銀行界人士紛紛為加息預期降溫，表明就算美國上調利率，本地銀行都未必跟加。有銀行家同陸羽仁講，今年第一季增長快，信貸需求同步上升近10%，到第三季，放緩情況都幾明顯，反映了中美貿易糾紛影響了信貸需求。由於本地銀行資金依然好多，自然不想加息影響做生意。
國際貨幣基金會昨日發表報告，話本地樓市抗跌力強，政府唔使急急減辣。家市場紛紛估計美國明年會放慢加息步伐，所以地產股都隨市反彈，新地升了2元，報112.2元，長實(1113) 升幅仲大，收56.95元，升了1.7元。
鐵塔穩陣 恒安腳軟
大市回彈，恒指重上26000關，收報26186，升了415點，國企指數收報10417，上揚172點，成交695億元。十大成交股中最突出係隻中國鐵塔(788) ，急升7%，收報1.37元，該股基本上係收租股，加上有5G概念，於是吸引資金追捧。
喺目前不明朗市道，投資者傾向保守，有資產同穩定收入嘅公司受捧，靠盈利推動嘅公司就相對波動，呢啲市況亦係沽空機構出動嘅好時機。噚日沽空機構Bonitas Research發表報告，指恒安(1044) 自2005年來已揑造咗110億元人民幣純利，喺佢嘅資產負債表上表現為虛假現金，加上負債纍纍，斷言恒安嘅股權最終毫無價值。
報告指，儘管截至2018年6月30日，公司現金同銀行存款餘額為198億元，營運資金餘額為76億元，但恒安一直積極籌集債務以支持其業務。2018年8月至12月嘅五個月，恒安向投資者發行六筆唔同嘅債務，共籌集75億元，其中大部份收益用於營運資金。自2005年以來，恒安已經支付咗186億元股息，意味住公司內部人士已經從股息中獲取至少約78億元。消息公佈後，恒安國際(1044) 開市無耐就停牌，待公司就若干研究報告所載資料發佈內幕消息公告。恒安股價曾跌8.8%，低見55.15元，停牌前報57.05元，跌5.7%，係呢啲市況畀人狙擊，就算好人好者都會腳仔軟啦。
陸羽仁
金融High Tea 舊文
來源 source: http://hdfin.stheadline.com