追逐風險回報
2018年12月04日
12月係基金埋數月，特朗普食完中期選舉，亦想食埋貿易利益整靚盤數，所以同中國打交亦暫時叫停，我唔郁你，你亦唔好郁我，但第一回合結束，講明有第二回合，未來三個月仲要再傾。
兩個大隻佬唔打交住，O依家改玩和緩，基金經理有人計數，亦有人
先炒一轉。呢個月全年埋數計花紅，呢個時間有好消息，正好推高指數，總之邊走邊射，實行炒住先。
濠賭少涉貿戰竟成贏家
「習特會」結果畀大家一個炒作機會，大市升675點唔算太多，各類股份有不同表現，有啲彈得多、有啲彈得少，點樣揀股都有分別。昨日濠賭股板塊升得勁，牌面解釋係澳門11月份博彩收入按年增加8.5%，勝於市場預期，金沙中國(1928) 收飆12%報37.9元；銀娛(027) 都勁升10%報52.8元；金沙及銀娛分別囊括升幅最大藍籌第一和第三位。美高梅中國(2282) 更彈上13%報15.12元；永利澳門(1128) 收飆11%報19.76元；澳博(880) 收飆9%報7.67元，買中呢個板塊都相當和味。
濠賭股表面炒11月數據，內裏都反映了資金在追逐風險回報，濠賭股和貿易戰無關，今年整體澳門賭收算係平穩，下半年回落有多少係跟跌，所以貿戰暫停，資金首先就追逐風險，借勢炒濠賭股。另一個原因，係12月是節慶日子，過完聖誕又有新年，跟住就係農曆年，年尾傳統例旺呢個板塊。若然中美關係好差，內地經濟受重擊，旅客去澳門必然受影響，更緊要係若然兩個打出真火，澳門O依家傾緊賭牌，咁有無可能搵美資博彩公司祭旗呢？O依家吊喺大陸頭上的懸劍拉番高，威脅無咁大，對於濠賭股自然有正面作用。從資金性質睇，銀娛市盈率21倍，比金沙同永利兩間外資公司低，原因相信係佢市值較大，盈利基數高有關，甚至有可能係有啲資金博美資賣盤，若然以業務表現計，銀娛反而穩定啲。
濠賭股彈得多外，手機設備股都顯著回升，也見追逐風險的現象，中興(0763) 升咗9%報16.74元；舜宇(2382) 飆8%收報81.5元；比亞迪電子(285) 收升72%報11.74元；瑞聲(2018) 收飆4%報57.9元。手機設備股反彈得勁，相信係跌得多，所以升得勁，有技術性因素影響。固然，如果中美打大仗，大陸對美國手機大幅徵稅，會對手機設備股好有衝擊，O依家避過一劫，造成急升理由。要留意係手機設備股除咗有貿戰風險，手機產品周期低迷，銷售整體放緩，特別係賣得貴的蘋果手機更加係面對圍剿，行業的負面因素並未消息。手機要推動換機潮，可能要等5G推出，令服務有新需求，喺美國大力打擊中國設備供應商，5G發展受阻下，手機股暫時仲未見到真正改善，所以這類股份技術性急彈，跟炒風險性相對急。
趁休兵短炒博聖誕禮物
市場投資氣氛隨著習特會有成果好轉，內地A股急揚2%至3%收市。恒指一舉突破二萬七大關，報27185，隨後一度收窄升幅至500點，見27006全日低位。收市恒指企穩二萬七關口再發力飆752點，見27259，為全日最高。恒指收報27182，漲675點；國指同樣飆高，收造10882，揚260點。美國業務佔比較重股份造好，豬肉股萬洲國際(288) 飆11.7%收報6.38元，為升幅第二最大藍籌；梳化股敏華(1999) 收升7.9%報3.67元；創科(669) 升7%收造45.05元。中國將從美國購買大量的農業、能源、工業及其他產品，以減輕兩國之間的貿易失衡。航運股普遍飆升，太平洋航運(2343) 曾飆10%，收升7%報1.88元；中遠海能(1138) 收升4.5%報4.42元；中遠海控(1919) 升3.14%收報3.28元。
趁住市況有可能轉穩，騰訊音樂周一申請美國IPO，騰訊(700) 曾升5.2%，見328.2元，創逾兩個月新高，收升4.1%報324.8元，成交額114.03億元。加拿大計劃明年1月起減產石油，帶動油價上升，中石油(857) 收升3.8%報5.7元；中海油(883) 收漲3%造13.7元；中石化(386) 升4%收造6.91元。
由於政治氣氛改善，大環境有一陣穩定，炒作的理由就會多，估計短期就算指數有調整，都唔會大跌，資金會陸續追下落後，譬如炒下美國來年減慢加息，大家趁住休兵時期出來搵食，等回吐時吸吓，希望博番份聖誕禮物。
陸羽仁
金融High Tea 舊文
來源 source: http://hdfin.stheadline.com