冰說聰明 - 青冰 2019年1月24日
冰說聰明：唔怕押股 最忌隱瞞 - 青冰
佳源國際主席兼控股股東沈天晴。資料圖片 適中字型 較大字型
龍床發展商佳源（2768）成為了近期最熱港股，查實當日爆出龍床金句的是俊和地產的董事，佳源係去年5月才入股項目，不過多得俊和的金句，龍床發展商之名不脛而走，但單靠個龍床盤，港人好快忘記，但上星期四的疑似斬倉，就名留青史了。
事態的發展，相信戰友都已經熟知，不贅。究竟是不是斬倉，人言人殊，今次就嘗試用另一個角度去睇。佳源在跳水前，長期企在12蚊樓上，市值三百幾億，即使去年末季市況極差，內房咁多壞消息，佳源股價都非常堅挺，完全冇調整過，回帶睇返當時的PE大概15倍，市賬率高達3倍，大佬呀恒大（3333）、融創（1918）及碧桂園（2007）等龍頭都係1.7至2倍，爆煲之後，個估值就低過行家了，事後孔明看暴跌得好合理。
業主見層樓值錢，加按套現好合情理，人哋老細都係咁諗，手持百幾億市值的龍床，按到三成都有五十億，所以上周急跌後出通告澄清，隻字不提押股，的確令青冰驚訝，好喇，昨天澄清通告終於話，因股價急跌而被強制平倉，沽了9,362萬股。上星期話已將到期債券清還，又約分析員解畫，懷疑被人惡意造空雲雲，到被人踢爆老細的公司佳源創盛曾押股99%，先至出來話還曬架喇，唔關龍床事呀。投資者其實唔怕你押股斬倉，但最忌你隱瞞事實，但都無事嘅，港交所最後一定不了了之囉。
昨天通告的另一亮點，就是提醒大家，公司向老細收購的物業管理公司，已於1月15日的特別股東大會通過，這筆價值6.9億的刁全數以股份支付，作價係13.73元，現價睇只係跌咗十蚊箒，有關的5,018萬股，已在星期一發行。1月15日通過，1月17日斬倉，世事的確係充滿巧合的，當日投贊成的2.8億股股東，換轉是今天，會否仍然贊成呢？哈哈。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com