金融High Tea - 陸羽仁 2019年1月24日
澳博易幟有機遇
2019年01月24日
美股杜指隔晚大插301點，港股喺外圍回落百幾二百點，但昨日低開後跌唔落去，之後反反覆覆，收市微升兩點。
華爾街吹起一陣拋風，有消息傳出中美貿易關係再現暗湧，美國甚至停咗預備會議。美股本來炒緊貿易談判有進展，忽然之間話有阻滯，於是就大力插咗一下。
霍何財團奪控制權
中美貿易談判出現爭拗，本來爭拗點傳係美國要設立一個監察機制，保證協議落實，中國反對。最新講法係大家喺知識產權方面分歧好大，甚至因此停止接觸，大吹利淡氣氛。不過，美國官員其後否認停止預備會議嘅說法。美國總統特朗普發文催促中國，話因為貿易戰搞到內地經濟咁差，叫中國咪再玩，應該盡快達成協議。美國喺日前啟動引渡孟晚舟嘅程序，有啲施壓嘅味道，反映談判可能遇到難處，白宮於是耍兩招。談判從來唔會順風順水，從特朗普叫中國快啲達成協議，都反映佢唔想撕破臉皮，期望喺副總理劉鶴訪美時能夠有功課交。
雖然美股大跌，但恒指因為之前一日已經調整，所以並無跟跌，成日喺二萬七關口反覆整固，最終靠穩微升2點，報27008點，力守二萬七；國指則收報10631點，升17點，成交金額縮減至778億元。喺藍籌股中，領展(823) 創新高，見82.2元，收漲1.12%，報81元，中資電訊股跑出，中電信(728) 創52周高，高見4.37元，收升5.3%，報4.36元；聯通(762) 收升4.3%，報9.04元，是表現最佳藍籌股。5G概念股繼續標青，京信通信(2342) 收升8.6%，報1.77元；摩比(947) 收彈6.4%，報1.17元；中國鐵塔(788) 續創上市新高，見1.72元，收漲5%，報1.68元。
經過一輪反彈後，大市氣氛開始重回觀望，如果中美談判唔破裂，首季有可能反覆再升，實行炒作一番。中環茶友話題係仲有咩股可買？有猛人就留意到，霍氏基金會同信德(242) 等組成財團，合共掌控53%澳娛股份。呢個主要由霍氏同何氏家族組成嘅財團成員間有協議，喺表決選出澳娛董事會成員時(下一屆表決將於2019年3月31日或之前進行)，提交共同提名建議，並共同同意澳娛主席同董事總經理任命。咁即係話，以何超瓊為首嘅信德系同霍家結盟，澳娛旗下上市公司澳博(880) 過去管治權分散同凌亂局面會告一段落，新財團會成為真命天子，控制澳博。
初步嚟睇，呢次澳博易幟有兩個機會，一係信德，過去信德擁有嘅澳娛雖然係貴重資產，但由於公司只係被動投資者，甚至派息與否都唔能夠作主，O依家變成控股財團主要成員之一，這批股份將大大發揮作用。二係澳博雖然係博彩業老大哥，但業績畀後浪推低，表現係幾隻博彩股中明顯遜色一員。O依家霍何兩家聯手出擊，江山初定，必然有新作風，有機會炒重估。
今次易幟消息似乎收得幾密，所以信德股價之前只係隨市波動，昨日收報2.59元，無升跌。信德O依家資產值9元，市盈率5.4倍，息率4.6厘，真係左睇右睇都睇唔到落注有咩大風險。澳博情況就有啲不同，昨日收報7.2元，升逾1%，以去年盈利計，市盈率20.7倍，息率2.6厘。由於澳博經營表現喺六間博彩公司中不屬前列，現價已經反映公司目前價值。
信德澳博各有賣點
若要下注呢隻股份，就要買公司有新人事、新作風，未來一如控股財團所講，會改善公司管治，從而令經營業績表現大為提高。澳博本身有唔少資產同老本，過去未能發力有好多原因，若然能夠改變管治水平，其實仲有大把潛力可以發掘。新財團正係睇中呢點，先至會聯手出擊，估計未來基金界會對前景作出評估，以反映最新股權結構。
陸羽仁
金融High Tea 舊文
來源 source: http://hdfin.stheadline.com