大棋局 - Mr. Tregunter 2019年1月22日
大棋局：中國貨幣政策要爆了 - Mr. Tregunter
中國加入WTO後不停賺外滙，但外滙儲備由2014年最高峯開始不斷流失，人民幣被溝淡，美元含量減少。 資料圖片 適中字型 較大字型
有一單重磅新聞，事緣財政部國庫司副主任郭方明表示，準備研究將國債與央行貨幣政策操作銜接起來。乜嘢意思？人民幣的發行，係行結滙制，有幾多外滙入嚟，就印幾多人民幣出街，條數叫外滙佔款。中國加入WTO後不停賺外滙，2002年央行的資產構成，外滙佔款唔到40%，但2014年3月飆到83.32%。即係話人民幣有八成美金含量。
結滙制問題，係當好景時外滙不斷流入侷住印銀紙，唔好景時外滙流出就會通縮。2014年係中國賺外滙的頂峯，之後外滙開始流失，外滙儲備由近4萬億美元跌至現時約3萬億美元。而人民幣發行有增無減，因為由2014年央行開始用MLF、PSL等方式增加貨幣供應避免通縮。這部份2014年佔央行資產構成唔到5%到2018年底佔29.9%。外滙佔款則由佔比83.32%跌到57.1%，即係人民幣被溝淡，美元含量減少。
用MLF、PSL這類放式投放基礎貨幣，頂到一時頂唔到一世。PSL以棚改抵押貸款，2020年後棚改差唔多冇得做；MLF一類貼現其實係以金融機構的信用作抵押，無限擴張等於亂印銀紙，人民幣就會變廁紙。咁就嚟料，貿易戰傳出中國以大手買美國貨作為和談條件，2024年將對美國順差降至0。中美貿易順差約3,300億美元，如果降到0，每年少3,300億美元流入，外滙儲備就難守。
去美元化勢必發生
美元萬劍歸宗，主動權在美國手；中國以降順差為條件，原理一樣但主動權在中國手，起碼可以自己控制流量。但當外滙越來越少，唔印銀紙，會通縮；要印，就要諗用乜嘢去抵押，此為中國即將要面對的最大難題。擴大國債在貨幣政策的運用，其實就係長遠學美國用國債抵押印銀紙。冇幾耐，內地媒體引述接近人民銀行人士反駁，國債唔係準貨幣。
反駁動作一定要做，否則容易讓市場以為要QE而波動。或認為《中國人民銀行法》第二十八條規定，中國人民銀行不得對政府財政透支，不得直接認購、包銷國債和其他政府債券，所以用國債印銀紙方法行唔通。
郭方明所提出的，係要引起市場討論，唔係話今日講完聽日就做。中國外滙儲備收縮會持續多年，大手買美國貨作講和條件為大概率之事。人民幣發行方式要諗出路，去美元化，將必然發生。由過去借助美元信用變為獨立自主，燃起財政部官員心中一團火，感覺在這個moment，要爆了。
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com