笑到最後 - 高明 2019年2月11日
笑到最後：升市有三大障礙 - 高明
適中字型 較大字型
今年1月港股升幅範圍廣泛，不僅指數股，其他二三線股都輕易上升，上周五港股最多跌456點，及後一度倒升，收市只跌44點，明顯有資金支持。一旦再升多個月，本欄肯定，市面上會有人指出牛市重臨。不過，高明都算係個有經歷嘅投機者，形勢一片大好時，遭到當頭棒喝，都唔知試過幾多次。
按非正式統計，升市輸錢輸得多過跌市，跌市可以直頭唔玩，升市一定會心雄、貪勝不知輸、越升越買，結果一次大調整足已重創。股票市場睇落變化莫測，實際上次次都差不多，至少有以下三大特徵，足以構成升市障礙。
一）淡友潛水：淡友一向係升市原動力，特別係過去兩年要炒嘅概念都炒到接近盡頭，高增長故事被質疑，挾淡倉成升市主要原動力。一旦挾至淡友潛水，可能已再無上升動力。例如本欄亦曾預言「標普要見個位數」，本來高明文庫內已隨時準備好無數「道指見小數位」、「DAX最恐怖歸零」等文章，一旦市況持續向下可即時刊登。但以上跟進文章仍未見街，即淡友有潛水跡象。
二）「收到風阿爺入市」：每次個市開始有上升動力時，總會有人宣稱阿爺掃緊貨，一定要跟。然後拋低幾句：「由於我知得太清楚，所以唔方便講咁白，總之堅料」。最奇怪係，上述阿爺論喺升得最好嘅2017年反而冇人講阿爺入市掃，冇人叫你跟。偏偏2018年跌市至今成日傳，越傳股價越平。今年高明已從不同途徑聽到有人聲稱阿爺掃貨，不得不防。
三）日賺百萬：升市另一特徵，就係參與者人人鬥吹大：「你唔敢贏呀？」、「同我掃兩球」、「我一日賺一球」，身邊越嚟越多人咁講，講得越興奮，伏味越濃。總之，一般升市障礙，都離不開有人同你講賺夠想畀啲你賺，大家可以重溫電影《龍咁威》，重溫咩叫「瑞士山區肺」。
高明
http://fb.com/bigricetea
笑到最後 - 高明 舊文
來源 source: http://hk.finance.appledaily.com