冰說聰明 - 青冰 2019年2月21日
冰說聰明：買中金是國家任務？ - 青冰
阿里巴巴購入1.17億股中金，現持有2.02億股H股，躍升為H股第二大股東。互聯網圖片 適中字型 較大字型
阿里巴巴於周二申報，購入1.17億股中金（3908），作價15.50元，現持有2.02億股H股，躍升為H股第二大股東，僅次於手執2.07億股的騰訊（700），難道是股權爭奪戰？但只要睇埋內資股，滙金揸住超過4成的總股本，牢不可破，應不會上演早年萬科A股的亂局，咁既然冇得話事，阿里點解偏要在有騰訊的地方插旗呢？
騰訊於2017年入股中金，當時話會在金融領域中合作，但兩年過去，唔覺有顯著的發展，今次阿里都係講類似的門面嘢，話睇中對方的投行業務，不過阿里去年已經入股華泰證券（6886），如果真係想發圍，搞起華泰似乎更好啊，動機實在耐人尋味。
換另一個角度看，或者這是個國家任務。阿里買的1.17億股，按權益披露，是由新加坡主權投資公司GIC沽出的，中金在1995年成立，除了建銀投資及中投保兩個中資，其餘的就是大摩、GIC及本港查氏家族的名力集團，大摩在2010年出售股權，GIC都有份承接。不過自中金在2015年底上市後，GIC呢幾年都只沽不買，沽到月初時只有約8%股權，唔排除佢哋係想一炮過沽貨尾，促成這單交易。普通中資股批股，禮貌地向中央打聲招呼，好正常吖，況且這是國內最強投行，沽畀邊個，相信也要安排妥當，如果騰訊有得揀，應該都希望自己去接，最不願看到的，就是被競爭對手買咗，所以「國家任務」這個陰謀論，青冰認為都講得通架。
經過一輪洗牌，餘下的半個外人就只餘名力集團，查家跟中央的關係應該不用多說，國家最重要的投行，都畀你做始創人，可見非常信賴，金發局及港交所（388）主席查史美倫，丈夫亦是查家人，所以有理由相信，日後名力悉售，就好似董伯伯賣東方海外（316）一樣，退休金嚟箒。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com