【大茶飯】旺市令人又愛又恨（青冰）
大市進入禾雀亂飛的階段，相信戰友都會感覺到，傳統智慧話，這個時候應該要離場了，怕一陣放完煙花散場走唔切，但睇煙花最後一定是最燦爛，早走抱憾，睇慣煙花大家都知大概放廿零分鐘，但股市那有時間表呢。
去年1月那狂升，大價股一個月飆四成，今次似乎未夠班，仲有嘅
係，去年1月冇乜炒細價股的，同今次唔同，再睇2015年大時代，細股比現在瘋狂百倍，青冰上周睇廿大升幅，都仲見到15%樓下的升幅，真係好克制囉。但留意返，邊個話今次一定可以媲美以上兩次牛市架呢？有時一個小陽春，好像去年4至6月咁，貿易戰剛開波，大股腳軟，中小型股發力，旺完一輪，之後都係一齊攬住死。
若果想青冰為後市作預測，戰友定必失望，跟開的戰友，都知小弟的門派並不是環球視野，點評宏觀經濟，那些還是留畀高手啦，青冰仍然一如既往，發掘中小股，盡量搵機會。
有戰友話近期好易炒，因為每逢有消息到，股價即時有反應，大家心雄，買貨就更狠更快，所以經常會出現睇到分析到但追唔到。中午出news，好似上星期國泰(0293)咁，勤力又快手應該有蟲吃，即市內地有炒作概念，你睇實內地財經新聞，還可勉強快一人步，但收市後的通告及消息，翌日定必大幅裂口高開，水位有限的確難以入場，更浪費了晚上做的功課，所以對於這些fast market，青冰真係又愛又恨。
雖然沒有水晶球，但有些重點還是可以留意。進入業績期，要細心睇公司條數，假盈喜假盈警一定要識分，盈喜但下半年增幅明顯放慢，盈警但下半年蝕少好多，這些都必須要注意，睇完數仲要看值博率，靚數但累積升幅太多，衝入場前要諗定止蝕位，成個二月都冇跟升，之前幾年又吃盡苦頭，如國泰及聯想(0992)，一炒turnaround，未必只是一兩日貨仔，值博率較高，當然你都要分析下你是慢了一小時入場，定係一日啦，如是後者，應該謀定而後動，等個靚位先兜。
除了年初頭兩日，指數都未試過連跌兩日，可以話係未抖過氣，未來幾天或有個像樣的調整，一直想入市的戰友，可以諗定心水，覺得已經炒完的，應該要部署分段離場，最曳嘅就係，到時先問：點算好呀？
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com