笑到最後 - 高明 2019年2月25日
笑到最後：炒股第一戒：靠自己 - 高明
今時今日財演眾多，投資者聽還聽，落注一刻，都係要靠自己。 資料圖片 適中字型 較大字型
炒股票究竟係「搵出優質股票長揸」，定係「唔好同股票談戀愛」，利世民兄提出炒股票嘅永恒矛盾。有時財演叫你長揸先穩陣，有時又同你講有糊唔食罪大惡極。究竟應該揸定係炒，股票市場再發展多一百年，都唔會有結論。
殿堂級財演畢菲特，平時好少講大市，多數講個股，但佢本授權傳記入面有評論過大市，用鳥去比喻股票，一鳥在手未必一定勝過百鳥在林，有時一鳥在手較好，有時百鳥在林較好，婉轉咁講佢對股市牛熊嘅理解。
至於點樣判斷揸股票定現金，第一個因素就係低利率，畢菲特每年喺巴郡股東會都會講一次「資產價格同利率有反向嘅物理關係」之類嘅說話。呢幾年如果有留意過香港樓市走勢，大概多少會知利率對資產價格嘅影響。
第二個因素，就係經濟增長高過正常水平，呢個易明，因為收入多過正常，有閒錢自然會去買股票。第三個就係投資者可以分享到嘅成果多過員工、政府，當中亦包含上市公司肯唔肯同投資者分享，淨係呢樣，香港已經過唔到關，亦解釋咗即使利率處於長期低水平，港股長年走唔出橫行上落。
就當上述呢三個因素係正確，其實亦不等於你可以喺牛市嘅時候就揸實啲股票，到熊市前就清曬倉。即使畢菲特冇老點你，始終同樣一種知識，喺股票市場上，有經歷過，同冇經歷過，係兩回事。
「搵出優質股票長揸」，定係「唔好同股票談戀愛」，分別在於時空嘅差異。2017年搵出優質股票長揸當然啱，到2018年則唔好同股票談戀愛，如何判斷，上述呢三個因素都幫你唔到，只能靠自己判斷。利世民兄結論話唔好盡信股票媒人（包括畢菲特及本人在內），高明覺得直頭要靠自己。今時今日財演眾多，聽還聽，落注一刻，都係要靠自己。
高明
http://fb.com/bigricetea
本欄逢周一刊出
笑到最後 - 高明 舊文
來源 source: http://hk.finance.appledaily.com