操盤手札記 - 割柑人 2019年4月30日
馬上成為壹會員
會員註冊/登入
【操盤手劄記】執靚盤數要瘦身 - 割柑人
滙控早兩日則傳出裁員消息，今年2月同前年2月，又係公佈業績前傳出裁員，結果業績都差過預期。
資料圖片 適中字型 較大字型
乾升！港股喺期指結算日升1%，但成交不足750億元，近3個月最少。鬼咩，北水五一截流，港股少條水喉。睇番上周，除咗《復仇者聯盟》、「服刑者聯盟」，仲有「走資聯盟」，中港股市都見走資。資金散水，利淡後市。
資金由新興市場回流美股，標指、納指再創新高。聯儲局本周議息，本港時間周四淩晨2時揭盅。值得注意嘅係，美滙指數突破98水平，升穿頭肩底頸線，不利新興市場。
息口敏感嘅銀行股，陸續派首季成績表，周二有渣打（2888），周五就有滙控（005）、恒生（011）。渣打上周傳出回購消息，睇下到時有冇交代。滙控早兩日則傳出裁員消息，睇返今年2月同前年2月，又係公佈業績前傳出裁員，結果業績都差過預期。
據《彭博》爆料，2月講過唔會考慮裁員嘅滙控行政總裁範寧，3月同班高層開會後就轉軚，聽講佢喺會上鬧爆班高層唔稱職。今年以嚟，環球金融市場扭轉去年頹勢，理應帶動炒房收益，若果首季JAWS（收入增長與支出增長差距）仍未轉負為正，唔炒人都難。
盤數唔靚，要瘦身執靚嘅，何止滙控。據《日經新聞》講，日本最大兼全球第五大銀行——三菱UFJ，計劃將東京總部嘅6,000員工減半，3,000員工將被調配海外或國內銷售部門，主要係臨近退休者。臨老先嚟外派，好少願去，即係叫佢辭職？滙控會唔會跟風呢？
據滙控綜合16間券商預測，首季稅前盈利中位數為55.84億美元，按年增長17.4%；撇除重大項目變動，經調整稅前盈利則為56.86億美元，按年減少5.8%。大摩估計，滙控今年將會開展新一輪回購。滙控現價股息率近6厘，若股價回落，股息率更高，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com