中美貿易談判劇本
2019年05月27日
美國總統特朗普突然出口術，揚言中美好快可以達成貿易協議，港股上周五上升，恒指收報27353點，升86點，不過成交金額都係得760億元。全周恒指累挫592點；國指累挫243點。
美國上周五就維持反彈格局，杜指升95點。特朗普散佈
的消息，推動油價上周五反彈，紐約期油收報每桶58.63美元，升1.2%；倫敦布蘭特期油收報68.69美元，升1.4%。
不過，原油市場基調其實唔太好，除咗中美貿易談判問題外，伊朗局勢有點緩和，美國原油庫存升至2017年7月以來最高，全周紐約期油累跌6.4%，創今年最大單周跌幅；布蘭特期油累挫4.5%。油價走弱，是環球投資市場弱化主要跡象。
摩通調低美國增長
美國最新經濟數據亦欠佳，反映經濟正在放緩。摩根大通經濟學家認為，4月份美國零售銷售報告糟糕，表明美國第二季活動增長，將按季大幅下滑，所以調整預測，將2019年第二季美國GDP增速，由原先估計的2.25%，調降至只有1%。摩根大通話，4月份耐用品定單數字轉差，加上上周零售數字表現差勁，反映第二季經濟活動有急速下行趨勢。
摩根大通同時調整對美國聯儲局利率預測，最新預期聯儲局下一步加息或減息機會均等。美國經濟走勢令市場聯想到聯儲局可能要減息，上周五美元回落，美匯指數收報97.61點，跌0.25%。
策略師開始唔相信特朗普唱好中美貿易談判嘅聲音，野村證券就發表報告，話短期之內有三個因素，令環球股市可能再跌。野村話市場氣氛仍然向下，第二波下跌快將來臨。野村總結三大負面因素。
短期走勢 衰多過好
第一，市場短線玩家例如大的對沖基金開始沽美股買債券，鼓勵其他人跟隨呢種悲觀嘅投資策略。好多交易員睇住標普500指數上周四盤中跌穿2820點，作為止蝕重要指標。標普500指數上周五收2826點，距離2820點仍然好近。
第二，美國聯儲局上周四凌晨公佈5月1日結束的議息會議記錄，顯示即使經濟狀況改善，利率喺一段時間內唔會有任何變化。野村認為投資者睇完聯儲局取態，覺得美國減息機會下降，更加唔傾向買美股。市場上仍然有很多人相信，聯儲局在今年12月會減息一次，但5月會議代表口氣改變，令減息機會下降。
第三，交易員相信第二輪波動在5月結束前會來臨，按歷史往績，在5月會炒恐慌指數(即波幅會上升)兩次，如今只出現一次，意味未來5個交易日有機會再大幅波動一次。綜合而言，野村估計本周杜指會再跌1%。
美股一插 侵侵唱好
睇返環球投資市場喺上周五反彈，主要由於特朗普上周四喺白宮見記者時，話華為事件可以包括在中美貿易協議中，中美可以好快達成協議。佢之所以咁講，全因股市大跌。
特朗普出行政命令封殺華為，令市場相信中美將陷入曠日持久的貿易戰中，上周四杜指一度跌400點，跌1.4%，特朗普就出嚟講嘢，講到華為問題好似有得傾。特朗普如果炒期指，必定賺到笑，舞落係佢，舞返上又係佢。
我哋不妨估吓特朗普劇本，o依家玩到咁大，太快同中國達成協議冇乜着數，主要原因有兩個。第一，明年11月先係美國總統大選，若然下月同中國達成協議，美股炒幾個月，最多炒到年底都玩完，明年又要諗炒乜嘢，侵侵都相當頭痛。點解唔拖到今年第四季先同中國達成協議，咁一直炒落去到明年，對大選更有利。
如意算盤 未必打響
第二，加稅後拖得時間愈長，對中國損害愈大，搞到中國更傷先達成協議，美國就可以食到盡。美國對中國貨加徵25%關稅，可以搬去別處生產的廠家一定快快搬，不過一時三刻，可能仍有相當數量要喺中國做，因為未搬得切，但拖得一年半載，大量工廠外移，中國會更傷。例如造鞋造袋，越南出口去仲有少少稅，喺印尼做完全冇稅，廠家一定從中國走晒，到時中國就要解決工人就業問題，應該會相當頭痕。
特朗普未來是否跟足劇本玩，尚係未知之數。從經濟上講，加稅會大部份轉嫁到美國消費者身上，例如美國鞋業分銷聯盟就估計，加稅後美國消費者要多付70億美元，換言之中國入口貨會加價，這會帶來短期通脹，更不利於減息。如今美國第二季GDP增長真係跌到1%，經濟差，通脹升，減息難，對美股就有壓力。
假設三種情況，第一係美股小幅調整或不調整，就不要期望中美很快達成貿易協議，隨時要拖到年底，未來美國再加3000億美元貨品關稅機會唔低。
第二，美股中度調整，杜指反覆跌20%以內，只要不急跌，中美也難很快達成協議。
第三，美股急挫，例如杜指一日跌1000、2000點，只要跌得夠急，特朗普一定跪低，中美可以即刻重開談判，快手達成協議。因為特朗普唔可能令美股爆煲，爆咗就好難救。
結論係按照目前走勢，特朗普都係有機會拖長時間，玩吓中國，香港股民就要捱吓啦。
最近有師奶朋友問起，騰訊(700) 同中國平安(2318) 現價入得未？睇返平保4月上過一年高位96元，比1月時低位65.95元，勁升45.6%，過去一個月跟隨大市急回，現價83.8元，比高位跌咗12.2元，回落12.7%。另一個角度睇，平保回吐升幅40%，未算回得好多。
買強勢股 時機未到
至於騰訊，4月先見半年高位401.2元(未到去年6月時嘅全年高位431.6元)，比去年10月全年低位251.4元，升咗149.8元。現價324.8元，比半年高位跌咗76.4元，回落23.5%，已回吐升幅51%。
騰訊上升力度不如平保，下跌幅度大過平保。雖然兩隻股都受大市、主要係中美貿易戰影響，但騰訊較為弱勢。假設貿易戰持續，騰訊比平保更有機會重回一年低位。
我畀師奶朋友嘅建議，係叫佢暫時忍一忍手，入貨未係時候，因為兩隻股都進入一個完美下跌形態中，未有見底跡象。不能排除它們有回試全年低位嘅可能性，特別係騰訊。
師奶朋友唔係想買入短炒博反彈，而係想買入作中長線持有，睇好呢兩隻股份嘅基本因素。我認為如果想買入長揸，就一啲都唔使急，因為中美貿易戰最負面因素仲未釋放出來，萬一美國再加3000億中國貨關稅，衝擊將會很大，由於兩隻股都遠遠未到一年低位，冇需要咁早就入市。
師奶問萬一中美達成協議咪走寶？我話呢個的確係一個風險，但若然出現呢種狀況，馬上入市買這兩隻股，可能買貴3%，但就避開可能再跌10%以上嘅風險，有數得計除笨有精。
陸羽仁
金融High Tea - 陸羽仁 舊文
來源 source: http://hdfin.stheadline.com