【大茶飯】翰森能否成藥明2.0？（青冰）
瀚森 豪森更多
早幾日有戰友留言，問隻新股翰森(3692)抽唔抽得過，咁青冰不嬲對藥股認識唔深，只能先問人再研究，得出的結論都係值得抽嘅，雖然認購期截止咗，但做咗的功課都唔好浪費，共諸同好嘛。
如果要研究藥，青冰真的無能為力，但從招股書仍然看到其
他有趣的事，令人聯想到兩年前上市的藥明生物(2269)，能否成為藥明2.0呢？先從翰森的背景睇嚇。先講主席鍾慧娟，係公司的創辦人，而另一強勁的身分，就是老公係恆瑞醫藥主席孫飄揚，恆瑞是國內藥股龍頭，外資透過港股通持有約13%流通股份，可見重視程度。
而另外兩個基金股東高瓴及博裕，皆是國內頂尖的私募基金，後者主打醫藥股，亦是藥明生物的主要股東之一，博裕的背景嘛，一字記之曰江，講完，這也是市場拿翰森及藥明相比的主因，又咁啱，當日藥明生物的保薦人團隊，有大摩，而翰森今次又係有大摩啊。講返高瓴及博裕，兩者都是近年才入股，按招股書披露，高瓴是2016年入股，作價約9.42元，而博裕就是今年2月先加入，作價係12.62，換言之博裕的成本價，非常貼近招股價，平時IPO，原有股東都難免被攤薄股權，甚至有基金會借勢減持舊股，而今次高瓴及博裕，就行使了反攤薄權，用招股價買入適量股份，維持2.9%及3.3%的股權。
兩年前藥明生物入場費過萬，已經非常趕客，今次翰森入場費係史上最貴的2.88萬元，加上同期有太興(6811)，論知名度及吸引力，翰森明顯不及，你睇孖展額就知，但市傳翰森仍想以上限定價，是否信心太爆棚呀？不過將兩者直接比較又唔公平嘅，太興集7億，翰森集78億，上市後翰森的市值，是七百億的龐然巨物，比藥明生物上市時的320億，多一倍有凸。
藥明生物在上市後四個月股價已翻倍，相信翰森難以複製，兩年前藥明生物生於牛市的中段，較容易有表現，當時有頂級科研及背景的藥股選擇唔多，依家個市咁曳，亦有不少生物科技股上咗市，大家都係觀望嚇先。而另一要點，博裕在藥明生物的董事局中，佔有一個非執董位置，可見當時係視之為長線投資，今次匆匆在2月時入股，亦沒有派人入局，似乎「江」味唔濃，但佢嘅入市位高，再行使了反攤薄權，同散戶的入市價相差無幾，咁都坐得安心。
唔好諗住翰森會入到恆指喇，事關藥明康德(2359)千億市值，上市日子已有半年，點都有資格過你，但港股通資格呢，翰森應可有快速通道的資格嘅。
Fb個人專頁http://www.fb.com/chingbing888
大茶飯 - 青冰 舊文
來源 source: http://hk.finance.yahoo.com