金融High Tea - 陸羽仁 2019年6月14日
零售股雪上加霜
2019年06月14日
市場焦點由中美貿易戰，轉至《逃犯條例》修訂，昨日港息上升，有人擔心會唔會係資金流走，但初步睇似乎只係因為美息下降，揸美元沽港元套息盤平倉，未必同資金流走有關。不過，英國政府已向旅客發出旅遊警示，加上之前啟德地王撻訂事件，都令本地投資情緒緊張。
《逃犯條例》引起社會動盪，非建制派用唔同方式抗爭。金鐘噚日爆發衝突，結果商店生意受影響，太古廣場要停業，港鐵金鐘站又封閉，好彩喺大場開得舖者，多數係連鎖大集團，若然只係單頭舖，太古廣場租金唔平，少做兩日生意，以零售業利錢咁薄，都已經好傷，所以市場都觀望往後點發展。噚日金鐘一帶稍為平靜，主要係立法會一早講明唔開會。按照原訂計劃，條例下個星期表決，現在已經遲咗兩日，表決都會推遲，即係影響冇咁快完結。
今年成績表不會靚仔
今次再度爆發佔領，有大型商業公司管理層大歎生意受影響，佢話影響唔在於出現衝突地區，最主要都係心理上。佢話，香港係富裕社會，基本上生活冇問題，好多消費其實都受心情左右，心情好感覺良好，使錢就會鬆手啲。若然氣氛緊張，使錢興趣就會下降。
管理層話，去年第四季起，零售生意開始轉差，今年特朗普以強硬姿態招呼中國，加上不斷向華為出招，令股市下挫，消費情緒開始回落，4月份零售指數疲弱，狀況係近年少見，現在再爆一單修例風暴，變成雪上加霜。一些大型零售商因為競爭力強，生意勉強做到持平，中小企業壓力就好大，如果問題唔可以好好解決，下半年市道真係令人憂心。
零售市道畀人打完心口打背脊，傷上加傷，賣手錶的寶光(084) 、賣化妝品的莎莎(178) 、賣便服的堡獅龍(592) 、佐丹奴(709) 、利福國際(1212) 都跑輸大市，全部見一年低位。以莎莎為例，昨日爆發亂局後股價下插，昨日上午指數下跌，股價跌到去2.09元低位，下午局勢轉靜，股價回彈至2.13元，升近2%。現時市盈率14.5倍，息率近8厘，呢個數字唔代表股票抵買，而係預期盈利會大跌，數字無辦法維持。
另一隻生意好本土的佐丹奴，多年經營都穩定，公司股價現時跌到去3.34元，市盈率11倍，息率超過10厘，昨日股價再插0.6%。佐丹奴過去幾年盈利都有4億元以上，派息超過25仙，這樣的息率足見市場對零售股情緒幾差。管理層以行內人意見睇，從中長期而言，個別零售股數字開始有吸引力，但因為估計未來公佈業績差勁，所以暫時不宜沾手。
特朗普心急猛叫開會
內地股市昨日稍為造好，但港股似乎暫時跟住本地政治形勢走，港股一開市跌勢就加劇，恒指一度急跌483點，低見26825點，其後見承接跌幅收窄，下午見市面暫無衝擊，指數逐步收復失地，恒指收報27294點，跌13點；國企指數收報10472點，跌22點，成交812億元。除咗本地因素，由於美國總統特朗普喺G20不斷出口術叫習大大開會，表現有點心急，兩國發展隨時都會影響市況。
藍籌股中港交所(388) 上揚1.2%，收報262.4元，表現相當叻仔。港交所周三本來搞周年周會，因為突發事件取消，好彩有阿里巴巴來港上市的消息贈興，股價特別硬淨。如果唔係市況麻麻，呢個消息都有得炒一炒。至於知名度頗高的本地餐飲連鎖餐廳集團太興(6811) 首日上市，收報2.64元，較招股價3元下跌12%，高低位分別為2.77元及2.48元，成交2.06億股，涉及金額5.42億元。不計手續費及佣金，一手1000股蝕360元。
陸羽仁
金融High Tea - 陸羽仁 舊文
來源 source: http://hdfin.stheadline.com