金融High Tea - 陸羽仁 2019年6月27日
覓地大計半殘廢
2019年06月27日
G20集團峰會召開前夕，焦點已集中在中美兩國元首會晤。中美貿易戰和則兩利、鬥則雙輸，這點相當清楚，作為被動一方，中國當然希望可以談得成，只係美國總統特朗普作風神經刀，雖然外界認為選舉臨近，他會保持克制，大家反應都仲係維持觀望，不敢過份樂觀。
G20集團峰會另一段插曲，係香港反對《逃犯條例》人士，準備趁期間向各國申訴，仲籌款賣廣告。G20峰會主題係各國合作，雖然西方多國曾對香港修例表示關注，但現在特區政府表明暫緩，同時啟動無期，估計各國不會有強烈反應，有消息指美國不會有重大表態。不過在會議前夕，香港會否再有激烈行動，都仍然惹起關注。
可考慮加快港鐵造地
自從修例遭遇滑鐵盧後，政府施政陷入短暫休克，重大措施全部叫停。繼「明日大嶼」撥款行到中途煞車後，官商合作的「土地共享」計劃都打柴。呢兩項計劃係覓地小組最重要的兩項大計，至今已經被打到半殘。
覓地小組花咗整整一年提出報告，全部都係舊瓶新酒，當中重點係要填海同加強發展地產商手上的農地。以「明日大嶼」為旗幟的中部填海計劃，一出就惹來大量反對聲音，計劃能否做得成，本來令人懷疑，現在政府變成超弱勢，本來項目過了財委會的前期研究撥款都要押起，根本連起步都無力。「明日大嶼」本來係遠水，能否造得成早就難料，現在甚至可以講係凶多吉少。
填海機會渺茫，本來報告視為中期重要舉措的「土地共享」計劃現在又叫停。喺修例未出事前，有發展商私底下認為概念吸引力有限，若然要他們真的積極參與，必須增加誘因，即係計劃要增加利潤比例。如果先導計劃成功，呢個想法或者可以達到，但現在政府若然被人鬧官商勾結，就變成黃台之瓜，何堪再摘，所以在政治上叫停是明智之舉，但覓地報告就變成一疊廢紙。
覓地報告搞咗一場大龍鳳，出嚟嘅報告有兩大失敗。最大失敗係完全冇輿論支持，完全做唔到凝聚共識，反而加劇矛盾，當中收回高球場的建議，更加令政府喺商界同國際間大失人心。二係覓地未成功，先叫停近郊發展、近岸填海呢啲短期措施。現在大計未成，供地變成嚴重惡化。
喺覓地報告打柴下，究竟有甚麼方法可解燃眉之急呢？有中環茶友話，可以考慮加快港鐵(066) 造地，因為港鐵造地爭議無咁大，透過喺旗下沿線覓地或加大密度，可以起到小小止咳效果。未知是否睇到呢點，所以最近港鐵股價屢創新高，昨日收報52.55元，再升0.4%。不過港鐵大股東係政府，若然政府陷入弱勢，港鐵都驚動輒得咎，有點滴汗。再者，沿線就算造地，都未必係入港鐵個袋，所以看好之餘，都係以低吸較為穩陣。
藥業股跑贏大市
修訂《逃犯條例》事件對香港國際形象影響，以及外資會否因此撤資，都惹人關注。財政司司長陳茂波就大派定心丸，話明白事件對香港國際形象有所打擊，特區政府往後工作將全力提升本港國際形象，並與國際社會作更緊密聯繫和向外推廣。他指金管局在密切監察，整體未見有明顯資金流走。近期港元走強，主要受半年結及派息此等季節性因素影響。資金無流走，但港股就相對淡靜，恒指全日波幅不大，收報28221點，升36點；國企指數收報10766點，漲23點，成交648億元。周二大挫的招行(3968) 微彈0.4%，收報38.65元。藥業股跑贏大市，中生製藥(1177) 升2.8%，報8.04元，為表現最佳藍籌股；石藥(1093) 升3.5%，報12.46元；三生製藥(1530) 升2.7%，報13.5元。
陸羽仁
金融High Tea - 陸羽仁 舊文
來源 source: http://hdfin.stheadline.com