操盤手札記 - 割柑人 2019年7月2日
【操盤手劄記】阿爺欠「投資」眼光 - 割柑人
友邦上周五破頂，不妨候低收集，但不宜高追。 資料圖片 適中字型 較大字型
如果阿爺係投資者，過去22年，買過4隻港股，本來每隻都諗住揸夠10年先放，可惜事與願違，第一隻「董建華」，揸咗7年零254日，該股「腳痛」退市；第二隻「曾蔭權」，揸咗7年零9日，該股捲入涉貪醜聞；第三隻「梁振英」，揸咗5年，該股以「家庭理由」退市；第四隻「林鄭月娥」，揸咗兩年，該股一個修例project一鋪清袋，隨時除牌。
作為控股股東，阿爺持貨期越嚟越短，呢啲股份有咩問題？先天後天都有問題：一、唔係公開招股上市；二、最多只得1,200名大戶擁有投票權；三、業務過於著眼大陸市場；四、太多關連交易；五、CEO太離地、太剛愎。唔改革制度，換馬都無用！
喺日本舉行嘅「習特會」大吹和風，中美同意重啟貿易談判，特朗普更放生華為，允許美企向華為供貨。不過，美國鷹派議員好㷫，反對解除華為禁令，矢言如果解禁，就會通過立法重新恢復！白宮急忙補鑊，強調並非「全面特赦」。
華為陰霾未散，但中美仲有偈傾，市場已收貨。周一，A股先升為敬，港股七一假後今日復市，可望跟升。恒指上半年埋單，反彈10.4%；單計6月，反彈6.1%，現時呈小雙底反彈格局，10天線快將突破50天線，短線先上望小雙底量度升幅29000。
習特friend番，利好投資氣氛。揀穩陣強勢股，可留意友邦（1299）。中國今年持續擴大金融業對外開放，銀保監3月批准3項市場准入同經營地域拓展申請，包括友邦進駐京津冀。瑞銀、大摩都唱好相關項目，大摩更估計下半年起錄得收入。
友邦上周五破頂，收84.25元。該股上半年累升31.5%，有望喺第三季以至下半年繼續造好。除咗進駐京津冀，友邦亦可望受惠今輪美債升浪，不妨候低收集，但不宜高追。
割柑人
本欄逢周二刊出
操盤手札記 - 割柑人 舊文
來源 source: http://hk.finance.appledaily.com