金手指 - 孫柏文 2019年7月2日
【金手指】習大反左大龍鳳？ - 孫柏文
五月初中美貿易談判反枱，估計係習大特登設計嘅一場國內打左大龍鳳。 資料圖片 適中字型 較大字型
五月初，中美貿易談判反枱。結果當然唔好，啱啱出嘅PMI採購經理指數，繼續直指大陸經濟萎縮。
聽美帝啲消息，上次反枱係因北京忽然將已傾好嘅協議條文，一一刪改。激到美帝玩一拍兩散，除關稅外，仲要鬱埋華為。點知，喺G20峯會見完面，特朗普突然放生華為，新華社話中美會以「協調、合作、穩定為基調」喎。比之前咩「小打小勝，大打大勝」180度飄移呀。
最正係特朗普被問到北京有乜妥協時，一向口沒遮攔嘅佢，突然封口。搞乜？其實孫柏文估，上轉反枱，應該係習大特登畀啲大陸「紅左」想點就點，原因係當美帝反擊時，後果好嚴重後，習大就可以同呢啲死硬派話：「試咗你哋要嘅反枱戰術，唔L掂囉。」真係一場國內打左大龍鳳。所以直線推斷，我今次真係對中美貿易談判會有真突破有真希望。
最後，周日睇股榮兄寫話根據金管局數據，香港銀行系統喺五月走咗1,200億。我自己都好期待見六月嘅數，因為真係當「反送中」喺六月初踏入高峯，市民真係開始被喚醒時，HIBOR就開始係咁上。連過半數按揭掛鈎嘅借一個月錢銀行同業拆息，都升到十幾年新高。
仲有，如果係香港人錢，走咗出去，而啲人又發覺啲服務差不多，啲錢係唔會返來。原來除咗大陸工業供應鏈被拆遷，香港嘅金融業都有同一威脅。歪政治牽動壞政策，後果嚴重啊。
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.finance.appledaily.com