冰說聰明 - 青冰 2019年7月4日
【冰說聰明】士多助王維基打江山 - 青冰
王維基較早前被問及對《逃犯條例》的意見，巧妙地避開了敏感議題，同士多老闆比，政治智慧高下立見。資料圖片 適中字型 較大字型
士多老闆上月出咗個撐送中post，激起民憤，罷買及取消戶口不計其數，更多網民更表明，轉而幫襯王維基的HKTVmall。實質有幾多生意去咗香港電視（1137），未來幾日將公佈的次季銷售數字，應看到端倪，不過股價就搶先爆升，6月升28%，股價起步之時，正是士多出post翌日。
王維基上月初出席股東會，被問及對《逃犯條例》的意見，他指與業務沒太大關係，不方便作答，巧妙地避開了敏感議題，同士多老闆比，政治智慧高下立見。
講番盤數，士多出事至六月尾，大概只有半個月，即使大家全部轉會，棄士多買TVmall，對整體的次季數字，影響相對較少，但市場上（包括青冰）將注視六月條數，多於整個次季的數字，如果六月爆靚，咁下半年增長應更勁。香港電視在3月公佈業績時，寫明今年的營業額目標是32億元，但首季只有6.34億，換言之次季交出10億，按進度才過半，係有難度架，不過即使miss，6月銷售額谷到3、4億，市場應該都收貨。
股價自5月底累升50%，在最近十幾個交易日成交大增，相信都不是靠一班盲毛推得鬱嘅，股價走在消息之前，最奇嘅係，如果google返近半個月香港電視或王維基的新聞，實在係乜都冇，最接近的是莎莎（178）正式進駐HKTVmall開網店，但你信唔信莎莎的加入，刺激香港電視股價升近五成？所以只能相信春江鴨掌握了更重要的資訊。
話說回頭，講來講去，都仲係講緊營業額，仲未見到盈利，王維基在股東會也直言，做少啲生意係會快啲收支平衡，但佢更想搶市佔率，因為有高銷售額，才會對商戶有更強的議價能力，換言之扭虧不是目標，谷大條數吸更多客，才是目標，這個策略，正是當年香港寬頻打破電盈（008）壟斷的招數啊。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.finance.appledaily.com