大棋局 - Mr. Tregunter 2019年8月20日
【大棋局】2020庚子躁動（三） - Mr. Tregunter
歷史之轉捩點往往需要關鍵人物，林鄭以777票奇異數當選，就係天數安排的關鍵人物。 資料圖片 適中字型 較大字型
中國仍趑趄於開放程度，原因好簡單，兩個部份。其一，中國的國家資本主義乃封企食祿，一方國企就係一方諸侯。共產黨掌控國企，你聽話，國企可以益你；你唔聽話，國企可以抵制你。對經濟之掌握，就係對人民之掌握。
政府高度控制國家經濟，有乜嘢事可以枱底數搞掂，可以用權力逼你硬食。例如債轉股給予兩個選擇，支持或不反對。國家經濟相對封閉可以咁玩，一開放，內地不少所謂龍頭巨企其實心照得啖笑。於外來競爭底下，共產黨對經濟之掌握力度必然下降，也就係對人民之掌握同時下降；過去所有以權力遮蔽的經濟問題，一旦開放對數唔知點搞。所以中國會用一種新方法處理。此為社會與經濟層面。
其二，開放，開放乜嘢？開放你嗰瓣定我嗰瓣。大家族老叔父享有封企食祿優待，開放就需要讓出利益予外資巨企。如此必然引起矛盾，點解鬱我嗰瓣唔鬱佢嗰瓣。凡改革必牽涉削藩，只不過現下改革迫於外力。此為政治層面。
林鄭是歷史轉捩關鍵人物
上述兩點，關係到政權之穩定性。再加上，現行之國際經濟秩序，乃1973年布雷頓森林體系瓦解後之秩序，正面臨衝擊與重塑。習近平多次強調，現下為百年未有之大變局，其故在此。中國最終當然要開放，清朝末年都無法鎖國，何況現下係2019年，斟酌的是程度。
但貿易協議一簽，中國最逼切要面對的問題為外滙流失，靠強大貿易順差搵外滙的日子不再，自然會諗計打其他地方主意。匹夫無罪，懷璧其罪。香港如果係一個四線城市，中共對今次逆權運動一早搞掂，並非香港人命矜貴啲。所以三日唔埋放風，一時話港獨，一時話顏色革命，一時話恐怖主義。明明大陸發生豬瘟，唔知邊得嚟咁多生豬肉。
在多重高壓下，香港170萬人選擇8月18日再度企出嚟。8月18係個特殊日子，1966年毛澤東首次接見大串聯紅衛兵，係8月18；1977年中共宣佈文化大革命結束，亦係8月18；1980年鄧小平發表《論黨和國家領導制度的改革》，確立政治改革，都係8月18。林鄭以777票奇異數當選，話受上帝感召，此為謙虛之辭。歷史之轉捩點往往需要關鍵人物，林鄭就係天數安排的關鍵人物。
分享第三曲，Enigma《Gravity Of Love》。
https://youtu.be/aSTV99Uy8hk
待續
Mr. Tregunter
本欄逢周二刊出
大棋局 - Mr. Tregunter 舊文
來源 source: http://hk.finance.appledaily.com