金手指 - 孫柏文 2019年10月15日
【金手指】炒英鎊易過提款 - 孫柏文
大選前就係沽鎊最好之時，而大插插之際，就係平淡倉轉揸鎊嘅機會了。資料圖片 適中字型 較大字型
幾日前，網上收視第一財經節目主持人梁心欣，問我換定啲英鎊好唔好？因脫歐好似有協議，驚英鎊會再升。咁心欣姐真係好鍾意去倫敦希斯路機場買嘢。年初佢去米蘭探我，都特登回程經希斯路，停半日去買嘢。
佢問，我就將9月24日見報嘅《金手指》寄畀佢。當日文中，最後我話：「所以，如果你要賭英鎊升，呢刻就應該揸英鎊。直至歐盟宣佈新方案，Johnson走出來話好正之日，就平倉。」嗰日到現在，英鎊真係升咗。
點都好，我都要提一提大家當日我篇文最尾一句「萬萬不能等到國會落實先平倉。因我唔識睇國會會否支持呢個方案，冇值博率。」
大家要記得，舊年文翠珊同歐盟都有個雙方滿意嘅協議，點知去到國會，連輸三次。所以，今次係咪通過到呢？
個博弈好簡單。保守黨約翰遜想連任，不過佢知咩歐盟滿意嘅協議如被落實，都會激嬲佔英國三成選民嘅硬脫歐派。信馬克思主義嘅工黨郝爾彬則無意執政，佢只係想摧毀出過戴卓爾夫人嘅保守黨。而最好嘅方法，就係保守黨執政下脫唔到歐，保守黨就會內爆。上次歐盟議會選舉，喺脫歐被延遲下舉行，保守黨得票創百年新低。自民黨則因「Fxxk！唔脫！」呢個競選口號，喺同一選舉成第二大黨，所以一定翻兜。
所以我預測，保守黨已失控制席數嘅英國將會再次推遲脫歐，之後就會大選。而大選前就係沽鎊最好之時，因硬脫派將會大勝。到時硬脫嘅最後一個阻力冇埋，一定嚇到英鎊腳軟，而大插插之際，就係平淡倉轉揸鎊嘅機會了。炒英鎊易過提款啊！
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com