智取大市 - 晉佳 2019年11月15日
【智取大市】中央搞攬炒的成本 - 晉佳
中央目前賭係民意逆轉，同時要將平息局面成本減到最低。 資料圖片 適中字型 較大字型
上期講到，月初林太喺上海見完兩位老細，回港後冇嘢改變，莫非兩派系喺四中全會未傾掂數？定係兩派共識正正係越亂越好？
中央目前賭嘅係民意逆轉，同時要將平息局面嘅成本減到最低，要開價求和，就必定要一矢中的，不成功便成仁，所以仲未開價。而警隊行動越離譜，局勢越亂，中央就期望成交價能夠低開、低收。情況同股災、金融恐慌時，買樓更容易壓價一樣。當然，決定香港嘅未來，點能夠以一般買賣比較，市民受唔受係另一回事。
外來投資、遊客消費大幅下跌，下一步，會唔會趁年尾焗大企業大裁員，進而打擊內需、影響樓價，形成短期「攬炒」局面，令淺黃一批都識驚，進而出師有名，做出個國際都睇到中央迫不得已嘅劇本，再鎖定年輕示威者進行鎮壓？機會係有，不過風險相當大，如果市民失業、手持自住樓反正下跌，失業者抗爭成本變相減低，可能更接受「攬炒」，亂局有升級可能，反而驚被炒、而未被炒之下，打工仔相對易控。嚟緊中美貿易協議、台灣大選當前，亦不容亂嚟。
香港大企業97過後，由高負債去到低負債，22年嘅正數經營現金流，令佢哋財政穩如泰山，要忍住唔裁員問題不大，佢哋食盡回歸後嘅紅利，捱一下只係獲利回吐而已。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com