智取大市 - 晉佳 2019年11月4日
【智取大市】國家隊4-5-1陣 - 晉佳
中央未來一年半載,整體經濟都係打守勢波，就以科技作為前鋒單箭頭去打個「4-5-1」陣式，防守及控球權為重。 資料圖片 適中字型 較大字型
四中全會完結，香港人當然聚焦喺談及香港嘅內容，「必須嚴格依照憲法和基本法對香港、澳門實行管治」、「建立健全特別行政區維護國家安全的法律制度和執行機制」，令各界揣測23條立法事在必行。警隊喺周六向示威者加大施壓，反映政府agenda係加快平息現時局面。
四中全會公報重點有一句「著力抓好發展和安全兩件大事」、「堅持穩中求進工作總基調」。「發展」相信係講緊5G、AI等多方面科技發展，並唔會因為中美貿易戰而停落嚟。「安全」大概係美國發動貿易戰、科技戰、來年可能出現嘅資本戰等等嘅威脅，仲有要喺高負債、高樓價之下維穩，最緊要唔好爆煲，意味住未來一年半載整體經濟都係打守勢波，以足球陣法去形容，就以科技作為前鋒單箭頭去打個「4-5-1」陣式，防守及控球權為重。經濟難予厚望，傳統周期股難靠得住，同時要發展，就靠新經濟股，睇嚟股市兩極化勢必加劇。
上周傳媒報道阿里巴巴最早11月底上市，連roadshow都唔使做，認真趕頭趕命，至於沙地阿美亦要12月喺沙地上市，大概反映今年唔上、出年更難上。莫非全世界預咗美國總統之位係特朗普同沃倫之爭？為資本戰做防風工作？唔排除出年比今年更亂。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com