收市閒情 - 千頌C 2019年11月20日
【收市閒情】人道救援組織不人道 - 千頌C
無國界醫生對香港人道災難不聞不問，係咪因為怕得罪中國被點名？互聯網圖片 適中字型 較大字型
香港出現人道災難，但「國際醫療人道救援組織」無國界醫生，對香港不聞不問，講明經評估後，認為「香港醫療資源與救援能力都是充足」，於是決定，唔派人幫手！
點解無國界醫生咁驚呢？或者答案就喺《人民網》嘅一篇文度搵到，標題如下：《揭祕香港亂局幕後推手：「掛羊頭賣狗肉』的 NGO！》篇文就提到，「自今年3月份以來，香港本地約50 家、境外超過100家NGO組織先後在『反修例』期間參與亂港活動。」
嘩！有咁多間咩？官媒當然有點名啦，帶何韻詩去國際演說嘅美國人權基金會當然係座上客，至於社聯、教堂亦都因提供休息、醫療而中箭；最慘烈嘅係紅十字會，因多次於示威現場設急救站或開班教急救，都被指為「人道主義救援背後的『攬炒』勾當」，仲要全部FB Cap圖為證。咁瘋狂嘅論調背後，反映緊中國已將打壓NGO一套行動，喺香港展開。
話說，《境外非政府組織境內活動管理法》（境外NGO法），早於2017年1月生效。你要喺中國運作，首先要搵政府部門作為主管單位作為你監管，搵唔到你就開唔到Office。同時，公安亦會對機構把關，每年續一次，你有咩差池，你成個Office就會GG。
今次歷時5個月示威，傷者無數。作為人道組織，本來救人係職責所在，但現實話畀我哋聽，國家機器已出動，更強迫救援機構，喺救同唔救之間二揀一。呢個係今日嘅現實，亦都好可能係未來，你真係接受到一個咁嘅香港？我接受唔到。
香港人多年來非常支持無國界醫生，單係2018年，年逾20萬人活躍捐贈者，年收捐款5.18億。粗略計算，我假設呢20萬人每人月捐200蚊，一年就收4.9億，佔一年所有捐款近95%。即係話，無咗香港呢廿萬人，呢個機構會完全玩完？唔會，無國界醫生今次向外界展示「世界是中國的」，作為愛國NGO，又點會咁易玩完。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com