到底邊個話事先？
2019年11月08日
中美貿易首階段協議原訂於今個月簽署，突然傳出可能要等到下個月至簽得成。中國商務部新聞發言人高峰在例行發佈會回應稱，達成首階段議重要條件，是美國同步、同比率取消關稅。內地股市收市持平，港股臨尾回勇報升。美國總統特朗普係談判高手，但國
家主席習近平打橋牌牌藝一流，兩個拗手瓜自然峰迴路轉，不會一條直路。
特朗普自詡係「玩嘢」高手，最近仲向英國「小特朗普」拋金句，話自己同人周旋，一直都係run the table。這句話成為用時事教英語的題材，意思取材自打枱波，圍住張枱不斷起手入波，即係一Q清袋意思，引申成「話事」之意。特朗普講得咁口響，皆因過去他做生意同人傾交易，靠死纏爛打經常佔上風。不過講到談判技巧，習近平都係絕頂高手，看準特朗普面對國會彈劾急於攞分，北京又會唔會隨便放行呢？看來叫習主席在美國簽約不是問題，問題係你叫我咁做，到底我有何着數？最後who run the table仲係未知之數。所以一日協議未簽，一日都要預有變數。
德昌底子厚可炒上落
大市氣氛觀望，個股炒消息，德昌電機(179) 公佈中期業績，股東應佔溢利1.62億美元，按年增16%，中期息派17港仙，被指好過預期，股價昨日急彈。
睇番德昌業績，大行普遍認為比預期好，瑞信調高評級及目標價，從「中性」升至「跑贏大市」，目標價由18.4元，調升至19.63元。睇番德昌中期盈利上升，主要是出售物業有特別收益，撇除賣物業因素，盈利其實倒退，但因為銅價回落，邊際利潤有改善。
大行認為業績好過預期，這是好主觀感覺，分析員預期差，公佈出來無咁差，就可以話好過預期。中環茶友話，買股主要有兩大手法，一類係發掘有潛力的增長股長揸；一類係找實力股高沽低買。
前者希望買中大升浪勁賺，但這類目標股不易發掘，風險也高；後者就要熟悉公司業務，期望一年執番10、20%利潤，這種玩法雖然好似無乜大志，但相對容易執行。好似德昌呢類上市多年的公司，就屬於炒上落對象，主要係公司在行業屬於龍頭，業務成熟，基本上唔會咁易死，而且有豐厚資產，底子夠厚，有需要時可以好似今年咁，出售一點投資物業來保持盈利。
睇返德昌股價過去一段時間處於下降軌，由33元水平高位反覆下滑，到早前的12.36元似乎已經見底。過去股價下滑主要係盈利倒退影響估值，集團主要生產微型馬達，這個行業與全球景氣和汽車工業周期有關。
由於之前經濟好車業旺，盈利去到高位後，本身有調整壓力，剛好撞正港股受內憂外患衝擊，股價就插到低位。現時市盈率6.4倍，息率3厘，估值不貴，公佈業績後反彈較急，仍然適宜候低才吸納。
港股尾市抽高報升
收市前國家商務部表示，中美同意隨協議進展分階段取消加徵關稅，消息隨即扭轉大市跌勢，一度急漲212點，收報27847點，上揚158點，大市成交金額778億元。過去六個交易日，恒指累積升幅達1179點。內地上證指數平收，收報2978點；深證指數收報9917點，揚0.57%。騰訊(700) 曾插逾2%，低見326.8元，尾市收復大部份失地，守住330元關，收報333.6元，僅微降0.1%。
醫藥股繼續搶鏡，周三狂飆逾1.5倍的長江生命科技(775) 繼續有得炒，收市抽高23.3%，收報1.11元，但比高位1.34元已經回落不少。藍籌股石藥(093) 上揚4%，收報21.4元，為表現最佳藍籌股；中生製藥(1177) 走高2%，收報12.10元。歌禮(1672) 抽升11%，收報3.91元；愛康醫療(1789) 飆9%，收報9.97元。
陸羽仁
金融High Tea - 陸羽仁 舊文
來源 source: http://hdfin.stheadline.com