金手指 - 孫柏文 2019年12月31日
【金手指】一注位置炒寶龍商業 - 孫柏文
只要聯儲局續印，去壓低佢哋嘅銀行同業拆息，隻寶龍商業管理喺未來一兩個禮拜絕對炒得過。資料圖片 適中字型 較大字型
從九月起，當花旗國銀行系統出現資金短缺，繼而令佢哋嘅銀行同業拆息飆升至遠超佢哋嘅中央銀行，即聯儲局定息，再令侵侵喺網上瘋狂攻擊聯儲局主席後，聯儲局就乖乖咁做個「非量化寬鬆」嘅印鈔行動。結果就係花旗股市，長升長有。2019年，亦係花旗股市表現差不多最好嘅一年。
咁喺我哋香港股市，除咗特區政府被揭係二仔底、冇料到、高分低能，無能擺平「群眾活動」外，仲要偉大祖國沒錢了，股市點都升唔鬱。不過，呢排唔算冇嘢炒，有啲跟風都幾和味。炒乜？就係啲啱啱上市嘅股票，例如大陸啲銀行，真係隻隻都喺上市後不論有冇回嚇，都喺一至兩周後破上市後新高。真係一注位置咁買，都有得執嚇。
有見及此，今日我都推番隻啱啱上市新股，寶龍商業管理（9909）。原因好簡單，就係啱啱上市，流通量細，接住未來幾個禮拜冇乜新股。個行業，即大陸物業管理，又真係之前上市嗰啲，雖然PE高，超貴咁上市，但路遙知馬力咁，隻隻喺上市後交得出高速盈利、營業額增長。
最佳例子有雅生活（3319）、碧桂園服務（6098）等，隻隻都係超貴咁上市，點知隻隻都真係交出之後嘅增長，股價升到甩轆。
所以只要聯儲局續印，去壓低佢哋嘅銀行同業拆息，隻寶龍商業管理喺未來一兩個禮拜絕對炒得過。一兩個禮拜後，唔理好醜都走，咁就買得安心。一注位置炒寶龍！
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com