智取大市 - 晉佳 2019年12月4日
【智取大市】增長股懶人計算法 - 晉佳
喺市況不就嘅情況下，可以揀選優質股、潛力股分段吸納，作為長線投資。 資料圖片 適中字型 較大字型
近排新股熾熱，吸引到一批新手進場。之不過有新手將抽新股賺到嘅錢，再翻兜已上市新股，結果輸返落去。
由贏變輸，主要係所投注嘅項目難度高低問題。翻兜已上市新股，明顯比抽新股難度高，結果喺冇做功課分析股份質地好壞，加上新股第一口價過後，優惠期已滿，交易對手唔同曬，翻啅贏面自然大減。難度高低，短炒在乎市況，氣氛越差越不利，長揸在乎估值高低，估值越高，對未來回報越不利，因此長線同短線策略會有所衝突。喺市況不就嘅情況下，揀選優質股、潛力股分段吸納，作為長線投資，只要有耐性，避開地雷股，操作上不算難。
近期港股兩極化嚴重，新經濟股、醫藥、物管、消費股累積升幅已多，冇蟹貨自然有利短炒，之不過估值已高，長期持有回報有限，於是比較有利短線操作。點樣估算一隻股票嘅回報潛力？簡單以一年投資期計（其實談不上長線），例如中生製藥（1177）每年盈利增長平均兩至三成，如果升至預測市盈率歷史高位約有15%上升空間，咁未來一年升至高位嘅最樂觀回報約四成，遠遠低過年初至今約1倍回報。然後拍埋下跌風險計一計數，先作決定未遲。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com