收市閒情 - 千頌C 2019年12月4日
【收市閒情】睇黨報睇壞腦 - 千頌C
大陸唔少人有個信念：「黨就是對的！」跟住黨嘅思路，就一定冇得輸。 資料圖片 適中字型 較大字型
區選建制大敗，相信衝擊唔少大陸人、甚至係克警嘅思維，「原來『支持香港警察嚴正執法』唔係沉默大多數心聲嚟㗎？！」唔好玩啦，睇黨報，從來只會睇壞腦，以下呢單極瘋狂嘅騙局，又係一個例子。
話說今年5月，大陸有種革命性嘅技術正式誕生，有個偉大嘅發明家，成功發明一種催化劑，只要加少少，就可以令水變成氫氣，然後成為能源推動車嘅引擎。簡單講，浙江青年汽車嘅老細龐青年，佢發明咗一架車，倒水入去，唔使入油唔使叉電，叮一聲，行得！WOW！一聽，就知又到偉大中國亮劍嘅好時機，據當地黨報《南陽日報》報道，南陽市委書記現場視察完，即刻直豎拇指，講曬雞腸「It"s very good」以示稱讚！
結果係點？青年汽車10月底時產已破。最奇情嘅係，據法庭文件，佢竟然呃咗50億人仔先破產！講返佢個人背景，其實佢自2010年已經開始喺唔同省份搵食，主要都係吹到個project大一大，然後呃投資、呃補貼，本身已負債纍纍，但單係2017年，都畀佢拎到1.18億元汽車補貼！即係話，佢玩咗唔同騙局達八年之多，今次故技重施，都仲俾佢呃到50億？
大家要明白，大陸唔少人有個信念：「黨就是對的！」跟住黨嘅思路，就一定冇得輸，一來南陽市委書記都畀Like、二來2017年《人民網》都報道過，黨報中嘅黨報，大字標題《青年汽車首輛水氫燃料汽車亮相 續航里程500公里》，更重要係光大金控，國企都係青年汽車投資者（難怪黨報都要報道）
講返香港，有日，金融圈朋友叫我估，「你知唔知點解黑警報嘅遊行人數，都係用『毅進制』，同現實數字遠到離曬譜？」我話，「因為條數唔係畀我哋睇，係畀阿爺睇」「冇錯！」一國兩制今日嘅徹底失敗，其中原因，相信係地方小官，隱瞞民意、欺上瞞下。我唔知中央錯估民情同黨媒新聞有幾大關係，我只知道，信黨媒嘅人證明咗「人一藍腦便殘」是真的。
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com