廣告經綸 - 文廸晞 2019年12月6日
【廣告經綸】挑機致勝之道 - 文廸晞
香港航空只要今個周六不要被釘牌，以後唔好再用品牌殺手成龍拍廣告，仍有機會翻身。資料圖片 適中字型 較大字型
今時今日，品牌競爭越來越激烈，產品差異化變細、價錢也拉近。近日，麥記推出了「麥炸雞」，擺明出手向KFC「挑雞」。麥記今次特別標榜炮製方法，以保濕、恒溫科技鎖住肉汁，誓要外皮夠脆，而且肉質嫩滑雲雲。
講到咁犀利，當然第一時間買返嚟撐OT，與一眾同事測試下。結果大部份意見都話麥記的雞髀大份啲，而且真係嫩口啲。相反，KFC的炸皮夠厚，所以論脆度仍是最高。
話說回來，自11月初先係KFC推出疑似麥記「麥樂雞」的「上校雞寶」在先，講到挑機，其實係KFC帶頭。對於顧客，競爭帶來更多選擇、更多推廣優惠，當然是好事啦。
另一邊廂，這星期一直炒得鬧哄哄，要算是香港航空的倒閉危機，這裏先不談到底會否被釘牌兼倒閉。跟國泰、港龍同是來自香港及以香港為基地的香港航空，早前如果可以「趁佢病、攞佢命」向國泰、港龍挑機成功的話，可能這次因反送中運動帶來的衝擊，就唔會傷到無足夠資金流去出糧咁慘。如以上炸雞例子，航空公司的產品可能都係差唔多，但品牌型像、服務質素、顧客忠誠度都可以相差好遠。只要全力提升一些競爭對手較弱的特點，再加上這幾個月來國泰經歷的風風雨雨，以香港航空作為一個challenger brand，的確係個突圍兼挑機的黃金機會。只可惜，可能係本身都有很多內憂兼外患，所以未能夠好好把握這個時機。
然而，現在才開始計劃一些策略性的轉變也並不一定太遲。因為國泰危機至今仍未化解，香港航空只要今個周六不要被釘牌，以後唔好再用品牌殺手成龍拍廣告，仍有機會翻身，一個唔覺意，甚至乎挑機成功。
無論是挑雞定挑機，市場定位和價格、宣傳策略、對於競爭對手的理解及預測都極其重要。要贏得漂亮，必須快狠準，遲了半步、去得唔盡、不夠火喉，就注定失敗。
文迪晞
mailto:heyadmen@gmail.com
heyadmen@gmail.com
廣告經綸 - 文廸晞 舊文
來源 source: http://hk.entertainment.appledaily.com