中環在線 - 李華華 2019年12月6日
雅居樂親友團齊撐景業名邦 - 李華華
陳卓賢（右）表示，對兒子陳思銘（左）一手創辦的公司上市感高興。 適中字型 較大字型
【中環在線】雅居樂副主席陳卓賢大囝陳思銘自立門戶開嘅內房公司景業名邦噚日上市，年僅30歲就做上市公司主席，上市儀式表現得多多少少有啲拘謹，但好在大班親友團全程幫佢打氣，同屋企人影相嗰時笑容特別自在。
親友團陣容龐大，除咗老婆、老竇陳卓賢之外，仲有一班叔伯陳卓林、陳卓南、陳卓雄，等同半個雅居樂董事會喺度。老竇陳卓賢就話對阿囝一手創辦嘅公司上市感高興，但就話自己退居幕後多年，冇咩做生意「貼士」畀到佢，「仔大仔世界，佢有自己嘅選擇，我尊重佢嘅決定。」佢家陣最開心係陪個囡去英國倫敦讀書，順便搵嚇投資機會咁。
陳思銘啲堂兄弟、陳卓林個囝陳思烺同陳思樂噚日都有到場賀一賀。佢哋呢一代人都算兄弟爬山、各自修行，總之唔返雅居樂。現時陳思烺同陳思樂搞緊檔聯合辦公空間「寰圖」，唔知家族入邊下一個上市公司主席係咪佢哋兩兄弟呢？
李華華
mailto:LiWaWa@AppleDaily.com
LiWaWa@AppleDaily.com
中環在線 - 李華華 舊文
來源 source: http://hk.entertainment.appledaily.com