智取大市 - 晉佳 2020年1月3日
【智取大市】圓底周期股追落後 - 晉佳
如果只係炒鋼價回暖嘅話，其實中國東方都有條件反彈，係落後股唔錯選擇。資料圖片 適中字型 較大字型
周期股升勢確比想像中強勁，一隻向來極少裂口急升嘅濰柴（2338），可以單日裂口急升半成，破完頂再破頂；同埋質地較好嘅傳統水泥股龍頭海螺（914）可以大陽燭爆升，反映強勢周期股已算係短期亢奮階段，高追就無謂，因為就算覺得周期股進入真正牛市升浪，大成交大陽燭咁升法後，都需要進入調整浪，博一浪高於一浪都寧願候低吸，況且畀自己更多時間冷靜了解周期性升市持續性，都唔係壞事。
強勢重工業股炒到咁癲，短線惟有留意更落後選擇。近日醞釀圓底破旗嘅有東方電氣（1072）、中國東方（581），東方電氣主攻電力設備，而中國東方係做鋼鐵。
鋼鐵股可謂近年最不受歡迎板塊，中國東方去年上半年純利跌43.7%，至16.66億元人幣，每股盈利45分，主因鋼價下跌，同時原材料鐵礦石價格高企令毛利率受壓，靠增加鐵礦石銷售嚟減輕痛楚，始終都賺少好多，去到第三季扣除財務成本淨額後嘅經營溢利5.7億元人幣，衰多兩錢重。不過11月起鋼價反彈，盤數可以止一止血，期望今年初鋼價續回暖。
其實以低迷嘅第三季盈利年度化，全年盈利都有近20億元，即市盈率都係得6、7倍，只係炒鋼價回暖嘅話，其實中國東方都有條件反彈，係落後股唔錯選擇。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://hk.entertainment.appledaily.com