這個農曆新年，戰友應該少咗去拜年，親友互相在WhatsApp問候，話題都離不開抗疫搶口罩，可憐的香港人，政府
既不封關，亦沒有為我們準備足夠的口罩，要靠自己人肉或電子排隊，青冰明白全球對口罩的需求急劇上升，缺貨係可理解，但當你望嚇澳門，特首講一句口罩供應充足，葡萄牙啲口罩畀我哋掃曬喇，贏盡掌聲。再回頭睇嚇林鄭，唉！
抗疫搶口罩搶糧草已經進入白熱化階段，只要你行入超市，或者打開個手機app，完全感受到咩叫掃清板。而相關股份都相繼起動，搶即食麵有日清食品（1475），搶米有金源米業（677），乜罩乜清潔用品乜食物都搶嘅有香港電視（1137），三股在農曆新年後表現強勁，但其實仲有一隻又有清潔用品又有口罩的股，相對落後，就是日本城的母公司國際家居零售（1373）。
以上幾隻股，論估值，國際家居零售最優勝，約11倍PE，股價經過去年大幅調整後，息率升至8%，過去六年無減過派息，有理由相信高息仍然能夠維持，另一賣點係有David Webb加持，現時持有6.01%股權，最近一次增持，就是在農曆年前的1月20日，增持價係1.8399元，長毛身為長線投資者，斷不會因為知有疫情降臨而短炒一轉，反而可能會諗，抗疫時間漫長，賣消毒清潔用品，又有穩定的採購能力，必然對生意有幫助。
青冰上過日本城的facebook專頁睇過，近期的post清一色係消毒用品及口罩，而經過屋企附近的門市，都見人流多咗好多，雖然沒有超市瘋狂掃清貨架，亦沒有HKTVmall個app被流量整死server這些亂象，但生意好咗是肯定的，凡事都係講值博率，有高息有概念，實在坐得舒服，靜待市場轉炒落後吧。
青冰
http://fb.com/chingbing888
本欄逢周四刊出
冰說聰明 - 青冰 舊文
來源 source: http://hk.entertainment.appledaily.com