武漢肺炎，橫掃全中國。外交部耿爽話，事件對中國經濟基本因素冇影響喎……國難當前，你真係可以講一句「相信政府！」「唔怕！
」？定係「瘟疫在前，支爆在後」？
一次瘟疫，相信令全世界覺醒，單靠一個世界工廠，真係會攬炒。
一個湖北，全省GDP達4.58萬億人幣，按年增7.5%，位居全國第7位；其中武漢更加被視為「中國的芝加哥、底特律」，係世界工廠中嘅核心工廠，單係武漢GG，中國工業都出事；家陣係全國停工，全國GG，對中國工業帶來嘅問題，暫時難以想像。
好啦，咁會以咩形式出事呢？早幾日，同孫柏文傾開計，大家就傾到一個問題，喂，啲人死嘅死，病嘅病，咁啲債，邊個還？
睇返湖北省地方債加城投債，今年到期嘅銀碼1267.9億人幣，全國排12；招商證券今個月有份Report，話全國第二高發病率嘅黃岡市，負債率都係全省最高頭三位。咁就出事啦，就算中國瘋狂出「不可抗力」證明，等佢哋唔使找數，但總會有數係要找㗎嘛。又真係唔好彩，今年3月，中國有約21億美元、息最少15厘嘅境外票據到期，主要都係內房債。生意又冇，又要還錢，點還呀？單係講緊廿年來都冇見過嘅國企美元債違約，最近兩個月已有兩間，嗰陣都未話有武漢肺炎，現時加埋疫症，有邊個夠膽講，中國債市好安全！工業重鎮崩潰、然後外資撤走、再崩潰、再撤走……呢咁嘅情況，你仲會還債嗎？
人行2019年上半年，幫30間大中型商業銀行做壓力測試，模擬重度衝擊情境下，GDP增長只係4.15%咁會點，結果發現，會有17家通過唔到測試。再睇返耿爽講咩，先話冇影響，然後加多句，「如果中國經濟受到衝擊，那麼必然會波及其他國家，世界經濟也必然會受到影響。」言下之意係，「冇事嘅，如果我有事，我都唔會畀你好過。」
千頌C
http://fb.com/winbigwok
本欄逢周三刊出
收市閒情 - 千頌C 舊文
來源 source: http://hk.entertainment.appledaily.com