上周一，孫柏文寫咗篇題為「我開始感到樂觀」嘅文。講到話因外國政府，特別係美帝，終於明白隻武漢病毒
有幾咁大鑊。所以當「承認問題」為康復嘅第一步時，開始可以踏上解救之路。
就喺篇文出街之後，美股連續四日狂升。一嘢就升咗兩成幾，返回書本話嘅「牛市」。作為一個97年已開始炒股票嘅人，真係可以同大家講，熊市反彈，永遠係最急。如要建美股沽倉，現時就係最好時機。
當然，未買得唔等於唔做功課。現時就係做定功課最好之時，因為終極市底出現時，係好明顯，你我他都會知。個市跌到啲股價似反映公司會執，你只要買到啲最後唔執嘅股票，就會賺到喊。
所以，呢啲動盪之時做功課係最易。因為首先你可以唔使睇歷史收入、支出，又唔使睇現金流。睇，就齋睇間公司嘅資產負債表。仲要資產一欄，齋睇現金有幾多。之後睇嚇佢幾多負債，同最緊要最緊要，係啲負債幾時還。如果你當佢現金外資產係零，佢又有能力還債，不過股價都跌到抵買，呢啲就係一棍買完等退休之trade。
用芒格當年買中石油（857）嗰句，你唔使計佢究竟係重200磅定200.2磅。如果佢賣緊嘅價話佢係瘦骨仙，不過你知佢係個肥佬，就可大棍落注。呢啲機會屬唔屬於你，就要睇你嗰刻有冇子彈了。小心買賣，祝君好運啊！
孫柏文
獨立股評人
http://fb.com/shuen
本欄逢周二刊出
金手指 - 孫柏文 舊文
來源 source: http://hk.entertainment.appledaily.com