「未來14日係防疫關鍵」呢句話，過年聽到𠵱家，仲要幾多個14
日？參考上世紀三次全球大流行——西班牙流感、亞洲流感、香港流感，都喺4月開始轉弱，若歷史重演，估計捱多一兩個月，環球經濟有望恢復。不過，大流行唔止爆一輪，小心！
以武漢肺炎過去5日全球新增確診分別達7.51萬、8.06萬、8.28萬、10.15萬、7.47萬宗嚟睇，期望疫情4月見頂回落，亦似乎言之尚早。環球經濟受創，衰退已成共識。各國封城堵截疫情，減息印鈔堵截衰退，惟只能為企業吊命，未能挽救經濟。
早前，有「鱷王」之稱嘅橋水創辦人Ray Dalio估計，全球企業將因疫情損失12萬億美元，接近中國或歐元區嘅經濟總量。企業損失只係頭盤，破產同債務違約先係主菜。有「華爾街預言家」之稱嘅歐洲太平洋資本總裁Peter Schiff就警告，若通脹升到4%，債務就會爆煲。
疫情之下，停工減產，供應下跌，各國放水，固然引發通脹；但執笠破產，減薪裁員，需求下跌，則會引發通縮。消費力同投資力大減，想唔衰退都難，更甚嘅係引致蕭條，現時前者機會較大。
美國總統特朗普一句「疫情出現好兆頭」，加上據報俄羅斯同沙地接近傾掂減產，美股期貨急升，帶動港股飆2.2%，收23749點。恒指守穩10天線，有力再戰24000關。疫情之下，home economy取代social economy，相關股份受捧。
宅經濟股中，除咗有網上消費、手機支付等業務嘅企業如騰訊（700）、阿里巴巴（9988），仲有提供上網服務嘅企業如香港電訊（6823）。5G開鑼，香港電訊食正條水，加上現價股息率有6厘，不妨留意。
割柑人
本欄逢周二刊出
操盤手札記 - 割柑人 舊文
來源 source: http://hk.entertainment.appledaily.com