【智取大市】等派彩勝過見高追 - 晉佳
資金輪動炒作越嚟越癲，證明揸住強勢股遲早會輪到炒起。 資料圖片
周一科技股唔鬱但建材股喪炒，水泥股可以單日升逾一成。然後周二輪到喪炒科技同醫藥股，大隻到騰訊（700）都可以單日升8%，夜晚睇怕到PDD同BILI喺美股表演。
資金輪動炒作越嚟越癲，
亦證明揸住強勢股遲早會輪到炒起，爭在最終升多升少，早起步定遲起步。
上一期提到裝配式建築股，周一急升然後周二急回，但市況氣氛相當好，遠大住工（2163）嚟緊上A股，照計遲早再衝過。呢個板塊近幾年獲得國策扶助，但隨住技術日趨成熟，大型發展商好似碧桂園（2007）、萬科近年積極發展裝配式建築，但並非每間內房企業都有呢個技術，冇嘅話就要拍住裝配式建築企業合作去做，至於遠大住工本身就係碧桂園嘅合作夥伴。國策之下，未來裝配式建築要達到新建建築一定比例，其中2025年要達到三成，而舊年新開工裝配式建築面積只佔整體13.4%。
遠大住工最賺錢係製造PC（預製混凝土）構件，佢嘅生產線使用率由2018年嘅17.4%大升至舊年嘅45.8%，短期而言，喺生產規模毋須大增之下錄得生意增長，好大機會拉高毛利率，營運溢利舊年大升74%，今年盈利有條件繼續爆升，市盈率只係16倍左右。股價兩日由高位回咗16%，趁調整可吸。
晉佳
http://fb.com/advanceguy1
本欄逢周一、三、五刊出
智取大市 - 晉佳 舊文
來源 source: http://s.nextmedia.com