【操盤手劄記】中美開拖怎部署 - 割柑人
中美開拖，避險情緒高漲，黃金成避風港。 資料圖片
疫情之下，香港已經傷春傷夏，仲要悲秋悲冬。疫情之外，香港又受中美關係緊張影響，擔心殃及池魚。兩國鬥完關稅鬥關館（關閉領事館），雙方喺外交層面向來只係口水戰，今趟係第一次喺外交層面採取對立行動
，冷戰變熱戰嘅機會升溫。
現時中美關係，似二戰結束至古巴導彈危機時嘅美蘇關係。美國全方位針對中國，除咗外交戰，亦發起金融戰，指人民幣滙率被低估，又喺南海、台海問題施壓。上周四，美軍派遣5架軍機遊弋南海；同日，解放軍宣佈封海演習，隨時擦槍走火。
中美開拖，美股連日下跌，側面反映美股資金嘅美滙指數亦連日下跌，觸及2018年7月以嚟嘅低位，德銀嘅美元貿易加權指數更跌至2011年以嚟嘅趨勢線以下，發出清晰嘅睇淡訊號。政治面同技術面都出現壞消息，避險情緒高漲，黃金成避風港。
事實上，根據富瑞資金流報告，最新一周，美股以至中港股票基金都見走資；黃金相關基金則連續6周錄得淨流入。周一，港股再跌0.4%，收24603，後市考驗3月以嚟嘅上升軌24000水平，反彈阻力則為10天線25100水平。
政治市兼逢疫市，正路係減持股票，並做好對沖。至於黃金，金價突破2011年高位1921美元，高見1945美元，創歷史新高。中長期嚟講，投資組合應有黃金，一來因為政治風險，二來量寬利淡美元，美元向下，金價向上。
若想買金，除咗實金，亦可考慮黃金ETF，現時港交所（388）有3隻選擇——SPDR金ETF（2840）、價值黃金（3081）、恒生人幣金ETF（83168），三者周一都創52周高位，以前者交投最旺。2840收1409元，升1.8%，蓄勢挑戰2012年高位1430元，宜候回吐分注吸納。
割柑人
操盤手札記 - 割柑人 舊文
來源 source: http://s.nextmedia.com