【大茶飯】從交易角度看美團（青冰）
【大茶飯】從交易角度看美團（青冰）
愛美團的，自然係因為幫到手贏過錢啦，恨美團的，可能係無參與，甚至是造過淡而輸錢。更多
如果說美團（3690）是今個浪的股王，相信唔會有太大異議，但投資者對佢只係愛恨參半，比起三年前的慢牛股王騰訊（700），明顯有分別
，愛美團的，自然係因為幫到手贏過錢啦，恨美團的，可能係無參與，甚至是造過淡而輸錢，而青冰同美團的關係，由始至終都是若即若離，趁美團創新高之時，分享一下吧。
美團上市之初（2018年），恕青冰孤陋寡聞，真係唔知係乜來，有傳媒在上市時係介紹，是國內openrice加foodpanda啦，由於當時W股普遍不受本地傳媒及投資者歡迎，結果上市時冇抽，之後有一段長時間都係冇睇的。到佢出首份業績，受累金融資產公允值變動拖累，勁蝕1,500億，係港股有史以來全年度蝕最多錢的公司，當時係好震撼的，但經過幾年來新經濟股的上市洗禮，大家都了解到，這些都是上市前發優先股所致，而當時美團的股價不足50元。
直至去年的10月青冰才首次買入，當時係因為滬深交易所宣佈，正式納入港股通成為標的，當時比起低位已是倍升，投資界的焦點，已放在去年次季轉虧為盈，如果是價值投資者，梗係嗤之以鼻啦，仲係幾百倍PE，但北水由那時開始日日買，股價亦是升多跌少，今年初突破一百蚊，高見116元。
食糊後低位難補回
青冰在上文說話，跟美團都是若即若離，是指經常買入，累積一定升幅後食糊，然後睇嚇補唔補得返，但以一隻長牛股來說，基本上每次買都比上一次高，而最失敗的一次交易，來自3月時被肺炎震走，在85至90元附近斬頭，當時為了顧全整個倉位著想，控制風險，咁事後當然知係接近底位啦。至5月時MSCI將調升美團在指數的比重，青冰也再衝過，最深刻的是，在生效當日的競價時段，竟然挾高5蚊，以146.7元收市，亦是再度分手的價錢，當日大家都認為係癲咗，谷咁行日後一定跌返啦，結果只是回吐三天。而最後一次交易就是在宣佈染藍前食糊，結果爆冷倒灶，以為執返身彩啦，但之後的交易日，急跌只存在了幾分鐘，亦把握唔到機會再入市。
說了一整篇，青冰似乎沒分析過美團的業務，係呀，純以交易角度出發，因為談業務講盈利及估值，梗係超級貴啦，爭辯也是無謂，但前輩教落，有智慧不如趁勢，適量參與還是必須的，估頂亦非青冰強項，所以日後操作，還是以短聚為主，覺得太癲就會企埋一邊，但不會用身體擋住一隻瘋牛。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com