金融High Tea——喪炒之王美蘭空港
中國科企面對總統特朗普扼殺，開始出招反擊，Tik Tok入稟美國法院挑戰總統行政命令，同時受留難嘅騰訊（700）旗下微信，因為有龐大用戶支持獲美國放寬限制，兩個消息都走向同一方向，美國話制裁你都一定會死，消息帶動港股反彈超過400
點，科企再度扮演領軍角色。由於昨日本地確診個案今個月以來首度跌至個位數嘅7宗，商場零售股都有炒味。
本地股近日乘住確診個案回落有番啲生氣，周六日見到商場人流車流開始增加，好多市民悶咗個幾兩個月，近日忍唔住出動。不過，如果同內地相比，香港嘅回升真係小巫見大巫，現時內地人無得出國，龐大嘅消費變成內部需求，呢股浪潮從美蘭空港（357）近兩個月喪炒可見一斑。
九倉估值平博掹車邊
美蘭空港自6月開始經常出現在10大升幅榜，之前該股多年來一直喺10元以以下徘徊，噚日公司收報50.2元，再升近7%，驟看以為公司曾經合股，先會變成大價股。不過，稍為仔細追蹤，發覺股價變大並非股本重組嘅戲法，而係5月開始由8元起步一直殺上。帶動公司喪升有兩股動力，一股係國家主席習近平5月底發出指示，定出海南嘅目標係喺2025年初步建立以貿易同投資自由便利為重點嘅自貿港政策制度體系，到2035年成為開放型經濟新高地，到本世紀中葉，全面建成具有較強國際影響力嘅高水平自由貿易港。及後6月1日 ，國務院發佈《海南自由貿易港建設總體方案》 海南11個自由貿易港重點園區同時掛牌， 涵蓋科技、商務及航天等領域，美蘭作為島內主要機場，股價開始喪炒。
第二股動力源自7月1起日實施海南離島旅客免稅購物新政，離島旅客進入海南旅遊時，每年每人免稅購物額度從每年每人3萬元人民幣提高至10萬元人民幣。由於內地旅遊下半年陸續重啟，新措施成為及時雨。美蘭空港對於國家政策帶來的機遇同時去到盡，集團動用過百億元興建免稅品城，購物城面積達到900萬呎以上，比海港城還要大2倍。有分析估計，大陸遊客出去歐美以至香港消費，結果反而帶來當地人的不滿，既然如此，不如有錢益海南賺，所以未來政策會向當地傾斜。
美蘭現時每股資產淨值12元，喪炒到50元全靠概念無窮發揮，不少股評早就話股價炒過籠，結果卻是愈睇淡愈升。7月份時，大摩曾經睇過該股，給予目標價是37元，這在當時已經非常進取，想像力相當豐富，但現在已經升爆表，好似這類國策概念股，夠膽炒無人知邊度係頂，只係一般人根本不敢跟。不過，從美蘭喪炒可以見到大陸內需的概念幾驚人，只不過香港目前仲係慢慢磨蹭點樣防疫抗疫，感受不到大陸控疫後谷成本國消費的狀況，其實，好似九倉（004）有不少商場係大陸，如果想炒大陸旅遊同內需，公司股價低位12元，現在升幅不算大，同美蘭的狂升更係無得比，都可以作為攀車邊的選擇。
科指升逾2%跑贏大市
其實，睇番內地股市基調都幾穩，反映經濟運行正常，昨日各市全線向上之餘，創業板指數收報2684，升幅更近2%。內地創業板造好，本港掛牌的科企帶動科技指數收報7329，漲2.25%，同時力壓其他板塊，恒指收報25551，升437點，成交增至1401億元。幾隻科企大股都造好，騰訊升5.8%，收報548元；同系微盟（2013）飆11%收報12.18元，為升幅最大的恒指科指成份股；阿里巴巴（9988）上揚近5%，收報264.4元；美團點評（3690）再飆升8%，收報265.8元；小米集團（1810）漲1.5%，收報18.44元。其他有好表現者包括友邦（1299），揚4.7%收報78.55元，撐起大市123點；港交所（388）走高1.2%收報381元。另外，蒙牛（2319）反彈3.8%收報35.65元，連同多隻內需股創上市新高，包括安踏（2020）、李寧（2331）、頤海（1579）、青啤（168）和敏華（1999），以上股份收市均向上。此外，周四將放榜的港視（1137）大升7%收報9.71元，錄得三連升。
陸羽仁
金融High Tea - 陸羽仁 舊文
來源 source: http://hd.stheadline.com