【大茶飯】從數據看壹傳媒及圓通（青冰）
【大茶飯】從數據看壹傳媒及圓通（青冰）
近日兩隻熱炒股——壹傳媒及圓通，在數據上有相似的地方。更多
圓通速遞（6123）不鳴則已，一鳴驚人，雖然青冰早於2蚊樓下推介，但點都估唔到會爆升到咁，這事也令專頁多了不少粉絲戰友，但就向青冰拋下一個比諾貝爾獎級
數更難的問題：「會唔會上返」，青冰並非先知，當然唔識答，只係權衡過值博率，選擇全面撤退，日後再玩，這篇文章將是短期內最後一次講此股，但就不用業務及估值角度去講。
上月中壹傳媒（282）狂炒廿倍，壹傳媒是在第二天見頂的。先講一些數據，壹傳媒發行股數有26億股，撇除大股東黎智英及管理層的持股，亦假設David Webb持有約4.9%的股份無沽，流通股份約5.96億股，爆升首天成交14億股，次天見頂日係40億股，第三天是15億股，第四天股價急回，成交6億股，一睇就知，這四天街貨轉手率十分驚人。
轉手率同樣驚人
去CCASS再深入看，首天淨買入最多的是富途、中銀、安里證券及越秀證券，分別買了2,712萬股、1,539萬股、1,100萬股及288萬股，但加埋都唔夠6,000萬股，證明市場都係玩即日鮮較多，經過首天，四間證券行分別持有4,171萬股、5,160萬股、1,100萬股及288萬股，換言之安里及越秀之前都冇貨。壹傳媒首天最高見0.40元，第二日最高見1.96元，第三日要跌四成了，但最高都仲見過1.75元。一個月過去，股價回歸平淡，中銀持股由事前的3,620萬股，增至現時的1億股，富途就由1,459萬股，增至2,845萬股，經過一場大龍鳳後，啲貨係去咗強手度，還是散戶接了，自己諗。
圓通發行股數有4.16億股，撇除母公司持有的2.68億股，流通股數約1.48億股，上周三暴升時，成交量有4.47億股，第二日股價一度高見12.30元，成交量有2.88億股，到第三天，成交量回落至7,779萬股，首兩天的轉手率都拍得住壹傳媒，截至執筆之時，CCASS只有首天的數據，頭五大的淨買入是大摩、富途、中銀國際、越秀及中銀，數量是464萬股、300萬股、283萬股、189萬股173萬股，加埋只有1,409萬股，同壹傳媒一樣，即日鮮極多。
由於未有第二及第三天的數字，暫難從CCASS數字判斷，是否都係老散接曬，但在權益披露裡，卻有另一發現。前老細林進展，辭任CEO後留任董事，在業績後狠沽603萬股，持股減至885萬股，這青冰亦早已提過，在上周五的披露中顯示，爆升那天再沽700萬股，平均價係3.6927元，手上餘下185萬股，而更有趣的是另一董事黃逸鋒，亦在同日沽出26.8萬股，平均價係6.1336元，個價明顯靚過林生，提返你，黃逸鋒在今年1月加入董事局，係內地圓通速遞董事長特別助理及副總裁，雖然廿幾萬股係細數目，但物輕情意重，代表性重大，若問母公司會否在短期內注資，黃生的行動可能是最好的答案。
青冰
http://www.fb.com/chingbing888
本欄逢周二刊出
大茶飯 - 青冰 舊文
來源 source: http://hk.finance.yahoo.com