金融High Tea——熱錢來港應無花假
螞蟻集團（6688）急行軍，通過上市後立即啟動招股，首日就遇上隔晚美股大跌，杜指一度下跌逾900點，收市仍挫逾600點。在美股大跌下，港股一度急插逾300點，不過跟住就見到不俗抗跌力，最後收報24787點，回吐131點。
港股今次頂得住，中環茶友話會不會因為螞蟻上市的維穩效應，實行死頂呢？照各種現象顯示，港股跌得少可能係美國放水造成資金氾濫，多過因為巨股上市死撐。睇番除了港股外，美國債息都回落推高債價，所以要我估，我會覺得係美國疫情翻爆，加上刺激經濟方案遲遲未出台，部份資金離開美股，一些熱錢避險買入債券，一些就流入香港買螞蟻。畢竟歐美印了這麼多鈔票，大家都要找地方停泊資金，故此見到近日陸續有資金流入香港，就算香港放假，外圍仍然轉錢到香港。從這些現象加上有外資大基金經理建議增持內地股票，熱錢來港應是真的流入，而不但是為巨股集資維穩。
螞蟻有價 先益騰訊
美股下挫暫時無對螞蟻招股有太大影響，據報國際認購獲超額5倍，將會提前一日截票。螞蟻能夠對抗不利大氣候，一個主要原因是同類科技金融股幾乎只此一家，加上螞蟻招股文件顯示，今年集團盈利增長接近70%，令全球基金覺得不能缺席，無法不買。
螞蟻現時一上市，市值就超過美國銀行，等同四、五間滙控。美國銀行有三億美國富裕人口的大市場，加上全球業務，螞蟻是否真係值得高過美銀估值呢？按現時螞蟻招股最高估值計，今年市盈率約38倍，同傳統銀行普遍只有個位數的市盈率高出幾倍。集團現時在內地用戶人口已經飽和，未來必須開拓國外市場，至於去國外市場會否像華為那樣被針對呢？這就要看中國經濟實力，至少在亞洲國家，中國應該仲有生意做。在內地螞蟻服務滲透率已經相當高，但在海外仍有拓展空間，而且利用支付服務，可以搶奪傳統信用卡等高毛利生意，故此市場願意支付高估值。從散戶角度，一萬年太久，如果用實資認購贏錢機會仍大，自然不妨下注。
受螞蟻受歡迎帶動，另一隻佔據內地支付市場半壁江山的騰訊（700）和滙控（005）逆市走強，兩股合力貢獻指數198點，仲令科指向好，收報7547點，升0.8%。騰訊旗下的WeChat有齊美國多間金融機構好似Paypal等功能，過去市場覺得騰訊最賺錢係手遊，現在對WeChat可能重新估值，加上美國法院駁回WeChat即時下架的上訴申請，消息令騰訊逆市創新高，一度高見588.5元，最後收漲4%，報585元。反而螞蟻主要股東阿里巴巴（9988）只係微升0.7%，收報300元，可能股價要等招股完成先發力。
限聚再放寬或利好零售股
抗跌另一功臣滙控宣佈上季業績，市場原先估計倒退逾70%，結果只係倒退36%，被指好過預期，明年二月將會決定是否派發股息，大笨象股價大升4.8%，收報33.8元，成交金額35.47億元，為表現最醒目藍籌股。滙控主要業務在香港，本地疫情控制比美國好，樓市始終無乜大跌，大大減少滙控呆壞帳壓力，相信係滙控業績保住無咁差的支柱，所以話香港幾時都係大笨象的安全港。
喺本地疫情紓緩下，本地餐館每枱人數放寬至六人，對於本地消費股都算係好消息，零售股莎莎（178）收報1.25元，跌1.6%；商場股九置（1997）報31.15元，無升跌。如果未來兩日感染數字無反彈，消費零售股表現或者都會好番少少。
陸羽仁
金融High Tea - 陸羽仁 舊文
來源 source: http://hd.stheadline.com