移民門檻太低，不用賣樓移民
老友睇雜誌見到筆者同星級分析員對壘，分析員話明年有大量市民移民離開而賣樓，樓宇供應自不然會增加，樓價自然下跌，我絕對同意有大量香港人離開，如果我不同意，樓價自然不會下跌，我雖然同意，但樓價仍然不會因為太多人移民而下跌。理由是不少國家的移民門檻很低，除了英
國的BNO計劃之外，台灣亦降低移民條件，只要200萬元新台幣就可以移民台灣，試問在如此低門檻之下，移民又何需要賣樓，不是太多人賣樓，樓價又怎會下跌。
至於為何英國，加拿大及台灣要降低移民條件，唔通真係咁好人？老實說，這個世界沒有好人，做到互惠已經很好，那些國家降低香港人移民門檻，最大理由就是合資格申請人不多。就好似一間食肆，如果經常爆滿，又何須要推出六折七折的優惠，不過，他們一定會話回饋顧客，以圖減低顧客話他們生意不佳的藉口而已。
移民好似結婚，男方有主動權，可以追任何一個女仔，女方有選擇權，可以接受或者拒絕任何一個男仔，結婚第一個步驟就是要了解，現在話移民的人有很多根本不了解將要去的國家，莫講話當地文化，風土人情，甚至連當地語言都唔識，這即是盲婚啞嫁，結咗婚先學對方語言，我相信未學曉就已經離婚。
香港人完全明白移民苦處，若非最後一步都唔會移民，如果那些國家好似女方吊高嚟賣，不但身高要1米8，個樣要省鏡，仲要有返咁上下身家，禮金當然唔會少。能夠移民去那些國家的人，會自視高人一等，現在反其道而行，女方不斷自貶身價，總之係男人就可以，身家200萬元新台幣足矣，咁嘅條件反而吸引唔到香港人移民去台灣，否則會被人睇唔起。
不過，如果唔同人講將會移民，一定會被嚇到瀨尿，又話一國一制，冇自由，財產會被充公等，現在就最好，有國家願意接受香港人，又不用太多錢，令到那些人可以移民，但又不用賣樓，因移民賣樓的人不多，樓價就不會因為有人移民而下跌。
作者為紀惠集團行政總裁
文章轉載自「AM地產」facebook:
http://bit.ly/2wls4EF
湯文亮專欄 - 湯文亮 舊文
來源 source: http://www.am730.com.hk