金融High Tea——超級大交易的利好啟示
傳出有意賣盤的SOHO中國（410）昨日開市停牌，待公佈敏感消息。由於公司股份停牌，睇好睇淡都冇得買賣。不過中環茶友講起，話若然賣盤成功，對大市氣氛都有幫助，屬於利好消息。
今次交易聽風聲已經有一段時間，今年黑石已有一個
交易，就係向陳志明買入日本FANCL代理權，有傳交易價達47億元，當時本地疫情仍然嚴峻，黑石實行淡市出擊，同時應該已經再啟動同SOHO中國接洽。按照原先建議，最大可能是黑石買入公司物業資產，涉資幾百億元，成事的話自然轟動。
黑石去馬反映投資復常
黑石重啟談判，有個重要時間意義，就是美國大選完結，前總統特朗普下台已經明確。美國政黨輪替，新執政的民主黨雖然同特朗普一樣，以北京為假想敵，圍堵內地大方向沒有改變，然而拜登作風和特朗普截然不同是比較重視程序，牌理較易捕捉。市場認為未來幾年中美在競爭之中，商業上不會像特朗普亂出神經刀。對黑石這類落重錘做超級大交易的財團，政治環境不好可以應對，最怕就係無路捉。換言之，雖然中美關係難重回昔日水平，但在交往就漸趨正常化，財團部署投資信心恢復。
另一個有利因素，當然係黑石買得內地房地產，等於看好中國內地經濟前景同人民幣穩定。SOHO中國在2020年8月公佈話終止交易洽談，但自從特朗普同內地喺貿易戰上開火，交易就變得愈來愈難成事，出公告只係最後證實死亡。當時中美貿易戰不但帶來政治風險，中國能否挺得過美國經濟打壓都係未知之數，所以如果今次交易成功，會釋放出利好商業信號。
黑石今次交易，除了個別公司影響，有中美商業投資上都有意義，由於交易詳情未知，加上股份停牌，故此作用未浮現，長假期後內地股市走弱，港股隨之跟跌。恒指昨日高開低走，曾大挫388點，失守28500點，低見28453點，創上月24日以來最低，最後收報28638點，下滑203點，投資氣氛偏淡，成交金額1437億元。大笨象滙控（005）下滑0.5%，收報47.35元；友邦（1299）走低1.7%，收報93.95元；美團（3690）走低1.6%，收報302.4元；創科（669）插3.5%，收報135.8元，為表現最差藍籌股。
燃氣股借意外調整
湖北省十堰市周日發生燃氣爆炸，造成25人死亡，過百人受傷。國務院安委會決定對事故查處進行掛牌督辦，國務院安委辦、應急管理部召開視像會議，指要吸取教訓，落實安全生產責任，排查安全隱患，嚴防特大事故。燃氣股明顯捱沽，中燃（384）中途停牌，停牌前急插14.5%；天倫燃氣（1600）收跌6%；潤燃（1193）收跌3%；北京控股（392）、新奧（2688）收跌2%；煤氣屬下的港華燃氣（1083）收跌1.1%。
燃氣股係今年強勢板塊，使用清潔能源係長期國策，不會因事故改變，這次調整主要是借勢消化升幅。從基本因素看，中央加強安全系數，有利上市的龍頭大公司，不應視為壞消息。
陸羽仁
金融High Tea - 陸羽仁 舊文
來源 source: http://hd.stheadline.com