笑到最後｜回顧2021︰扭轉清倉派的跨代貧窮思維（高明）
笑到最後｜回顧2021︰扭轉清倉派的跨代貧窮思維（高明）
大家買美股有如印度坐火車爆曬棚嘅乘客一樣，只係想坐順風車，咁就揸穩啲。
經歷加息之亂後，美股再度發力，納指更加再次挑戰16200點水平。如果12月大半個月瞓咗冇睇，可以
簡單得出結論冇事發生過。
美股、外匯、加密貨幣免費即時報價，自選投資組合獲取相關新聞提示。
現實當然係life must go on 生命總要繼續，即係成個跌市睇到曬。跌市眾生相，就係好多人選擇清倉，相信現時另一抉擇，就係個市升返上來，應否用更高嘅價錢買返原先個倉。
拉長10年去計，呢個就係人生交叉點，截稿前納指今年上升22%，假設未來10年升幅一樣，投資10萬美元入去，10年之後，就會變成73萬美元。
數未必可以直接計，但係如果你拉長納指過去股價圖嚟睇，長線向上嘅趨勢冇變過，只係近年半升幅加劇。
內心覺得股災 通常淡底
類似12月嘅跌幅，今年至少出現過五次，如果每一次一有跡象下跌就要清倉，跟住市況突然轉變倒升，內心夠強大嘅話，相信損失只係每次追返，仍然大致上食得返升幅。
但係叫得清倉，內心一定係覺得股災，覺得一年會經歷五次股災嘅人，本身都係淡底，以今次跌市為例，低位連升四個交易日，相信咁快扭轉看法唔容易，更加大機會，年頭那次跌已經清咗倉。
一般來講，清倉後遇到指數再突破，之前清咗倉嘅貨貴咗，本身又係淡底，肯定唔會買返相同嘅貨，為咗追返損失，一定會劍走偏鋒，投向高增長股。然而，今年係高估值股嘅地獄，唔係大跌都長期橫行，幾個月後，又出現一次股災危機，高增長股低位再打，無限輪迴，更甚者，可能會心入邊覺得美股太貴，港股好抵，轉去港股再搏殺牛熊期指之類。
如此情況就會好似10年前「高位」沽咗香港層樓，頭兩年好風光，一大嚿錢任舞。交兩年租，使緊一節，樓價又貴咗，醒嘅就新界樓都買層先，固執嘅就日日話樓價太貴。
普通人要認命 坐順風車
所以高明成日叫人千祈唔好清倉，特別係你本身滿倉，清倉代表由100%睇好個市，幾個掣之間突然100%睇淡個市，要問自己，呢啲奧運金牌級嘅動作，點解得你一個做到？再問多句：點解要咁做？因為，deep states同old monies都唔會咁做。
照照塊鏡，你邊位？點解個市會通知你落車，然後跌到你滿意嘅水平，跟住等你上返車、拎齊行李，仲要問多句有冇同行乘客，沖埋茶，跟住施施然開車？
如果鏡入面只係一個市民樣，就請認命，大家買美股有如印度坐火車爆曬棚嘅乘客一樣，只係想坐順風車，咁就揸穩啲。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com