笑到最後｜今年納指高過恒指（高明）
笑到最後｜今年納指高過恒指（高明）
今日預測2022年納指點數跑贏恒指，可能都係一個好保守嘅預測。
港股連續兩日接連跌穿兩萬點及萬九點， 本欄曾經都叫鑽研過港股，睇見港股進入散場格局（散場唔係散水，散水係食完飯撇，散場係食完飯間酒樓都執埋）， 美股港
股都係股票，兔死狐悲，喺選股之前， 揀啱個場都好緊要。
美股、外匯、加密貨幣免費即時報價，自選投資組合獲取相關新聞提示。
所以今日預測2022年納指點數跑贏恒指，可能都係一個好保守嘅預測，因為納指唔一定要升，只要恒指不斷下跌，就會跑贏。情況有如恒生科技指數由納指級數嘅點數，已經跌得低過標普500指數，仲要期內標普都係下跌。
美企威力勁 港股冇得比
兩個指數嘅點數計算唔同，跑贏跑輸只係標題上嘅作用，實質上面比較，就係納斯達克嘅成份股嘅企業能力，跑贏恒指成份股。本身呢個已經唔係一個太大爭議， 唔使計咩PE同PB，最近全球制裁俄羅斯，美國企業已經顯示出佢嘅龐大威力，只係兩隻股份撤出俄羅斯：蘋果（AAPL）及Google（母企：GOOGL），整個國家已經可以倒退30年，仲未計其他SWIFT、信用卡，以及其他口腔期產品，歐洲制裁雖然都勁，但美企制裁係直接令俄羅斯絕大多數人返回Google前嘅生活水平。
相同程度，港股市值最大兩隻股份騰訊（700）及阿里巴巴（9988）， 如果撤出一個市場，都會對消費者有一定程度影響，但數落建行（939）、中移動（941）、滙控（005）， 影響力就差得遠，港股長期寵兒港交所（388）， 冇得用佢嘅服務，對全球絕大多數人生活並無影響。
返番轉頭講兩個市場企業能力。企業存在目的，都係為解決問題， 世界嘅轉變越嚟越快，身於香港逐漸會發現日常用作解決問題嘅產品，開始同港股企業無關。最大嘅問題住屋，本來香港起住宅嘅發展商都有呢個屈機位，但過去十年樓價大升而發展商股價橫行，已經證實股價跟唔到樓價，欠缺霸權股最應有嘅因素：股價持續上升，所以成為唔到霸權股。
現時喺香港真正跟得上世界轉變，幫手解決問題，可能得一隻香港科技探索(1137)，其他土炮唔係無用，但美資更強勁嘅替代品更多，廣東話親切啲可能已經係唯一續用嘅原因，但近年都去廣東話化，其實冇乜分別。
可能會有人話：美股都跌唔少。但深入少少睇，美股大部份生存到嘅股份，由疫情爆發到在家工作到重啟，大致上都跟到趨勢，連蘋果玩到爛都仲可以變M1 M2晶片出嚟；恒指成份股入面大部份嘅嘢期內都冇乜進步。
港股始終係尋租形經濟，憑實力尋租，點解要創新？美股雖然都有尋租，但企業間較鍾意踩人哋條界，為保住自己護城河而努力。
好耐以前市場興砌股票足球陣，已經知道港股一線勉強放到上枱面，後備已經冇乜競爭力。去到今日，正選砌11隻似樣都有啲困難。最後防線連點數上被納指超越，都只係時間問題。
高明
facebook：https://www.facebook.com/bigricetea
IG：https://www.instagram.com/koming.usstocks/
作者簡介︰賺錢係目標，炒股係手段，專欄記載由手段到目標嘅過程。
本欄逢周三刊出
笑到最後 - 高明 舊文
本文作轉載及備份之用 來源 source: http://hk.finance.yahoo.com